തൃശ്ശൂര്: ട്രെയിനില് ടിക്കറ്റ് ചോദിച്ചതിന്റെ വൈരാഗ്യത്തില് ടിക്കറ്റ് പരിശോധകനെ തള്ളിയിട്ട് കൊലപ്പെടുത്തി. എറണാകുളം സ്വദേശിയായ ടിടിഇ കെ. വിനോദാണ് കൊല്ലപ്പെട്ടത്.
പ്രതി ഒഡിഷ സ്വദേശിയായ രജനീകാന്തിനെ റെയില്വേ പോലീസ് അറസ്റ്റ് ചെയ്തു. എറണാകുളത്തു നിന്ന് പാറ്റ്നയിലേക്ക് പോകുന്ന ട്രെയിനില് ഇന്നലെ രാത്രി 7 മണിയോടെ തൃശ്ശൂര് മുളങ്കുന്നത്തുകാവിലാണ് സംഭവമുണ്ടായത്.
എസ് -11 കോച്ചില് യാത്ര ചെയ്തിരുന്ന പ്രതി അമിതമായി മദ്യപിച്ചിരുന്നു. ടിക്കറ്റില്ലാതെ ട്രെയിനില് യാത്ര ചെയ്തിരുന്ന ഇയാളെ ടിടിഇ വിനോദ് പിടികൂടി. ടിക്കറ്റ് ചോദിച്ചപ്പോഴാണ് വിനോദിനെ പുറത്തേക്ക് തള്ളിയിട്ടത്. ട്രാക്കില് വീണ വിനോദിന് മുകളിലൂടെ ട്രെയിന് കയറി, തല്ക്ഷണം മരിച്ചു.
ട്രെയിനിലുണ്ടായിരുന്ന മറ്റ് യാത്രക്കാരാണ് റെയില്വേ പോലീസിനെ വിവരമറിയിച്ചത്. വടക്കാഞ്ചേരി സ്റ്റേഷനില് നിന്ന് വിവരമറിയിച്ചതനുസരിച്ച് ട്രെയിന് പാലക്കാട് എത്തിയപ്പോള് റെയില്വേ പോലീസ് പ്രതി രജനീകാന്തിനെ പിടികൂടുകയായിരുന്നു. രാത്രി ഇയാളെ തൃശൂര് ആര്പിഎഫിന് കൈമാറി.
