ചേര്‍ത്തല: വെറ്ററിനറി മെഡിസിന്‍ കോഴ്‌സ് പഠിക്കാന്‍ ഫിലീപ്പീന്‍സില്‍ പോയ മലയാളി വിദ്യാര്‍ത്ഥി കുടുങ്ങി. ചേര്‍ത്തല അര്‍ത്തുങ്കല്‍ കുരിശിങ്കല്‍ അലോഷ്യസ് വില്‍സന്റെ മകന്‍ സാവിയോ അലോഷ്യസാണ്(31) ഫിലിപ്പീന്‍സിലെ സാന്‍കാര്‍ലോസില്‍ ദുരിതജീവിതം നയിക്കുന്നത്. 2016ലാണ് സാന്‍കാര്‍ലോസിലെ വിര്‍ജെന്‍ മിലാഗ്രാസു സര്‍വകലാശാലയില്‍ സാവിയോ പഠനത്തിന് ചേര്‍ന്നത്. 2019ന് ശേഷം നാട്ടിലേക്കെത്താന്‍ കഴിയാതെ ഫിലീപ്പീന്‍സില്‍ കഴിയുകയാണ് സാവിയോ.
വിസയുടെ കാലാവധി കഴിഞ്ഞതിനാല്‍ നിയമനടപടികള്‍ക്കുള്ള സാധ്യതകളും ഉയര്‍ന്നിട്ടുണ്ട്. വീട്ടില്‍ നിന്നും മലയാളികള്‍ വഴിയെത്തിക്കുന്ന തുക ഉപയോഗിച്ചാണിപ്പോള്‍ ദിവസങ്ങള്‍ തള്ളിനീക്കുന്നത്. നാലുവര്‍ഷത്തെ കോഴ്‌സിന് 15 ലക്ഷമാണ് ചെലവ് പറഞ്ഞിരുന്നത്. എന്നാല്‍ 2024 ആയിട്ടും കോഴ്‌സ് പൂര്‍ത്തിയായിട്ടില്ല. ഇതിനൊപ്പം 37 ലക്ഷത്തിലധികം രൂപ ചെലവായിക്കഴിഞ്ഞു. നിലവില്‍ 10 ലക്ഷം അടിയന്തരമായി നല്‍കണമെന്നാണ് യൂണിവേഴ്‌സിറ്റിയുടെ ആവശ്യമെന്ന് അച്ഛന്‍ അലോഷ്യസ് വില്‍സണ്‍ പറഞ്ഞു. കഴിഞ്ഞ ആഗസ്തില്‍ വിസ കാലാവധി കഴിഞ്ഞതിനാല്‍ യൂണിവേഴ്‌സിറ്റി ഹോസ്റ്റലില്‍ നിന്നും പറഞ്ഞുവിട്ടിരുന്നു. ഇപ്പോള്‍ പലയിടങ്ങളിലായാണ് താമസം. വിദേശമന്ത്രാലയത്തില്‍ പരാതി നല്‍കിയിട്ടുണ്ട്. കൊവിഡ് വ്യാപനത്തിന്റെ പശ്ചാത്തലത്തിലാണ് കോഴ്‌സ് നീണ്ടുപോയത്.
ഡോളറിലാണ് വിനിയോഗമെന്നതിനാല്‍ ഇവിടെ നിന്നും അയക്കുന്ന തുകയുടെ 50 ശതമാനത്തോളം മാത്രമേ അവിടെ ലഭിക്കാറുള്ളു. നിയമ നടപടികളിലേക്ക് കടന്നാല്‍ പഠന സര്‍ട്ടിഫിക്കറ്റും പരിശീലന സര്‍ട്ടിഫിക്കറ്റുടക്കം നഷ്ടമാകുന്ന സാഹചര്യമാണ്.
10 ലക്ഷം രൂപ നല്‍കിയാല്‍ പരിഹാരമുണ്ടാക്കാമെന്നാണ് സര്‍വകലാശാല അധികൃതര്‍ അറിയിച്ചിരിക്കുന്നത്. മകനെ രക്ഷിക്കാനായി വീടുപോലും വിറ്റ് വാടകവീട്ടിലായിരിക്കുകയാണ് കുടുംബം. വാടക കൃത്യമായി നല്‍കാന്‍ കഴിയാതെ വന്നതോടെ കുടിയിറക്ക് ഭീഷണിയിലാണ് ഇവര്‍. കേന്ദ്ര സംസ്ഥാന സര്‍ക്കാരുകള്‍ മകനെ തിരികെ കൊണ്ടുവരാന്‍ സഹായിക്കുമെന്ന പ്രതീക്ഷയിലാണ് സാവിയോയുടെ കുടുംബം.
