കണ്ണൂര്: പയ്യാമ്പലത്തെ സിപിഎം നേതാക്കളുടെ സ്തൂപം രാസവസ്തു ഒഴിച്ച് വികൃതമാക്കി. അന്തരിച്ച സിപിഎം നേതാവ് കോടിയേരി ബാലകൃഷ്ണന്റെ സ്മൃതികുടീരത്തില് സ്ഥാപിച്ച ഫോട്ടോയിലും ചടയന് ഗോവിന്ദന്, ഇ.കെ. നായനാര്. ഒ. ഭരതന് എന്നിവരുടെ സ്മൃതികുടീരത്തിലുമാണ് രാസവസ്തു ഒഴിച്ചിരിക്കുന്നത്. ഇന്നലെ രാവിലെയാണ് സ്മൃതി കുടീരങ്ങളിലെ ഫോട്ടോകള് വികൃതമാക്കിയ നിലയില് കണ്ടെത്തിയത്.
എന്ത് ദ്രാവകമാണ് സ്തൂപങ്ങളില് ഒഴിച്ചതെന്ന് വ്യക്തമല്ല. കോടിയേരി ബാലകൃഷ്ണന്റെ സ്മൃതികുടീരമാണ് ഏറ്റവുമധികം വികൃതമാക്കിയിരിക്കുന്നത്. ബിജെപി, കോണ്ഗ്രസ് നേതാക്കളുടേയും മറ്റ് സാംസ്കാരിക നായകരുടെയും സ്തൂപങ്ങള് ഇതേ സ്ഥലത്തുണ്ട്. എന്നാല്, ഇവയൊന്നും വികൃതമാക്കിയിട്ടില്ല.
പി.കെ. ശ്രീമതി ഉള്പ്പെടെയുള്ള മുതിര്ന്ന സിപിഎം നേതാക്കള് സ്ഥലം സന്ദര്ശിച്ചു. തെരഞ്ഞെടുപ്പ് മുന്നില്ക്കണ്ടുള്ള ആസൂത്രീത നീക്കമാണിതെന്ന് സിപിഎം ആരോപിച്ചു. വിശദമായ അന്വേഷണം സംഭവത്തില് ആവശ്യമാണെന്നും സിപിഎം ആവശ്യപ്പെട്ടു.
