ഗോദാവരീ തീരത്ത് മാറ്റത്തിന് വേണ്ടി പട നയിക്കുകയാണ് ദഗ്ഗുപതി പുരന്ദേശ്വരി. ബിജെപിയുടെ ആന്ധ്രാപ്രദേശ് സംസ്ഥാന അധ്യക്ഷ. രാജമുന്ഡ്രിയിലെ നായിക. സാക്ഷാല് എന്.ടി. രാമറാവുവിന്റെ മകള്… ചന്ദ്രബാബു നായിഡുവിന്റെ തെലുഗുദേശം പാര്ട്ടിയുമായും പവന് കല്യാണിന്റെ ജനസേനാപാര്ട്ടിയുമായും സഖ്യമുണ്ടാക്കിയാണ് ആന്ധ്രയില് വിജയം കൊയ്യാന് പുരന്ദേശ്വരിയുടെ പടപ്പുറപ്പാട്. ആന്ധ്രയെ വിനാശത്തിലേക്ക് നയിച്ച വൈഎസ്ആര്സിപി ഭരണത്തിന് അറുതി വരുത്തി വികസനത്തിലേക്ക് കുതിക്കാന് പുരന്ദേശ്വരി നല്കിയ ആഹ്വാനം ആന്ധ്രയിലെ ജനത ഏറ്റെടുക്കുകയാണ്.
ഗ്രാമങ്ങളിലേക്ക് എത്തിയ മോദിപ്രഭാവത്തിലാണ് ബിജെപി വിശ്വാസം അര്പ്പിക്കുന്നതെന്ന് പുരന്ദേശ്വരി ചൂണ്ടിക്കാട്ടുന്നു. കര്ഷകര്ക്ക്, ചെറുകിട കച്ചവടക്കാര്ക്ക്, കൈത്തൊഴില് ചെയ്യുന്നവര്ക്ക്, വീട്ടമ്മമാര്ക്ക് തുടങ്ങി എല്ലാ മേഖലകളിലും മോദിയുടെ പ്രഭാവമുണ്ട്. പച്ചമുളകും തക്കാളിയും വഴിയോരത്ത് നിരത്തിവച്ച് വില്ക്കുന്ന സാധാരണക്കാര് വരെ ഡിജിറ്റല് ഇന്ത്യയുടെ ഗുണഭോക്താക്കളാണ്… ഈ മാറ്റത്തെ ആര്ക്ക് മറച്ചുപിടിക്കാനാകുമെന്ന് പുരന്ദേശ്വരി ചോദിക്കുന്നു. ഈസ്റ്റ് ഗോദാവരിയില് മാധ്യമപ്രവര്ത്തകരോട് സംസാരിക്കുകയായിരുന്നു ബിജെപി നേതാവ്.
ആന്ധ്രാപ്രദേശിനെ വിനാശത്തിലേക്ക് നയിച്ച സര്ക്കാരാണ് ജഗന്മോഹന് റെഡ്ഡിയുടേത്. വികാസത്തിലേക്ക് കുതിക്കാനാണ് എന്ഡിഎയോടൊപ്പം ചേരേണ്ടത്. അഴിമതിയല്ലാതെ മറ്റൊന്നും ചൂണ്ടിക്കാണിക്കാനില്ലാത്ത വൈഎസ്ആര്സിപി ഭരണം അവസാനിക്കണം. ആന്ധ്രയും മാറ്റത്തിനൊപ്പം സഞ്ചരിക്കണം, പുരന്ദേശ്വരി പറഞ്ഞു.
