പാലക്കാട്: ആലത്തൂര്‍ പൊലീസ് സ്റ്റേഷന്‍ വളപ്പില്‍ ദിവസങ്ങള്‍ക്ക് മുമ്പ് ആത്മഹത്യാ ശ്രമം നടത്തിയ യുവാവ് മരിച്ചു. കാവശേരി സ്വദേശി രാജേഷ്(30) ആണ് മരിച്ചത്.
ആലത്തൂര്‍ പൊലീസ് സ്റ്റേഷനിലെത്തി ഇക്കഴിഞ്ഞ 24ന് രാജേഷ് സ്വന്തം ശരീരത്തില്‍ മണ്ണെണ്ണയൊഴിച്ച് തീ കൊളുത്തുകയായിരുന്നു. ഉടന്‍ തന്നെ സ്ഥലത്തുണ്ടായിരുന്ന പൊലീസുകാരും മറ്റുള്ളവരും ചേര്‍ന്ന് തീ കെടുത്തിയ ശേഷം രാജേഷിനെ താലൂക്കാശുപത്രിയില്‍ പ്രവേശിപ്പിച്ചു.
95 ശതമാനത്തോളം പൊള്ളലേറ്റ രാജേഷിനെ പിന്നീട് വിദഗ്ധ ചികിത്സയ്‌ക്കായി തൃശൂര്‍ മെഡിക്കല്‍ കോളേജിലേക്ക് മാറ്റി. ഇവിടെ ചികിത്സയിലിരിക്കെയാണ് ഇന്ന് മരണം സംഭവിച്ചത്.
രാജേഷിനെതിരെ വിവാഹിതയായ ഒരു സ്ത്രീയുടെ പരാതി ഉണ്ടായിരുന്നു. ഇത് നേരത്തെ പൊലീസ് ഒത്തുതീര്‍പ്പാക്കിയതാണെങ്കിലും കേസുമായി ബന്ധപ്പെട്ട കാര്യങ്ങളെ തുടര്‍ന്നാണ് ആത്മഹത്യാശ്രമം എന്നാണ് നിഗമനം.
