ലഖിംപൂര്‍: കോണ്‍ഗ്രസ് എംഎല്‍എ ഭരത് ചന്ദ്ര നാരാ പാര്‍ട്ടി വിട്ടു. താന്‍ പാര്‍ട്ടിയില്‍ നിന്ന് രാജിവെക്കുകയാണെന്ന് മാത്രം പ്രതിപാദിക്കുന്ന ഒരുവരിയിലുള്ള രാജിക്കത്താണ് കോണ്‍ഗ്രസ് അധ്യക്ഷന്‍ മല്ലികാര്‍ജുന്‍ ഖാര്‍ഗെയ്‌ക്ക് കൈമാറിയത്.
ലഖിംപൂര്‍ നൗബോയിച്ച മണ്ഡലത്തിലെ എംഎല്‍എയായിരുന്നു നാരാ. ലഖിംപൂര്‍ ലോക്‌സഭാ സീറ്റിലേക്ക് ഉദയ് ശങ്കര്‍ ഹസാരികയെ കോണ്‍ഗ്രസ് സ്ഥാനാര്‍ത്ഥിയായി പ്രഖ്യാപിച്ച് രണ്ട് ദിവസങ്ങള്‍ക്ക് ശേഷമാണ് നാരാ രാജി പ്രഖ്യാപിച്ചത്. തന്റെ ഭാര്യയും മുന്‍ കേന്ദ്രമന്ത്രിയുമായ റനീ നാരായെ ഈ സീറ്റില്‍ മത്സരിപ്പിക്കുമെന്നാണ് പ്രതീക്ഷിച്ചിരുന്നത്. സീറ്റ് മറ്റൊരാള്‍ക്ക് നല്‍കിയതില്‍ പ്രതിഷേധിച്ചാണ് രാജിവെച്ചതെന്നും റിപ്പോര്‍ട്ടുണ്ട്. ആസാം കോണ്‍ഗ്രസ് മീഡിയാ സെല്ലിന്റെ ചുമതലയില്‍ നിന്ന് നാരാ ഞായറാഴ്ച തന്നെ രാജിവച്ചിരുന്നു.
