വിനയ് ശർമ തിരക്കഥയെഴുതി സംവിധാനം ചെയ്യുന്ന ‘ജെഎൻയു: ജഹാംഗീര് നാഷണൽ യൂണിവേഴ്സിറ്റി’ സിനിമയുടെ ആദ്യ പോസ്റ്റർ പുറത്ത്. ഉർവശി റൗട്ടേല, സിദ്ധാർത്ഥ് ബോഡ്കെ, പിയൂഷ് മിശ്ര, റഷമി ദേശായി, സൊണാലി സെയ്ഗാൾ, രവി കിഷൻ, വിജയ് റാസ് എന്നിവരാണ് ചിത്രത്തിലെ അഭിനേതാക്കൾ.
കൈക്കുള്ളിൽ ഞെരിഞ്ഞമരുന്ന കാവിയണിഞ്ഞ ഇന്ത്യയുടെ ഭൂപടമാണ് പോസ്റ്ററിലുള്ളത്. “ഒരു വിദ്യാഭ്യാസ സർവകലാശാലയ്ക്ക് രാജ്യത്തെ തകർക്കാൻ കഴിയുമോ?” എന്നും എഴുതിയിരിക്കുന്നു.
ട്രേഡ് അനലിസ്റ്റും സിനിമാ നിരൂപകനുമായ തരൺ ആദർശ് സിനിമയുടെ ആദ്യ പോസ്റ്റർ പങ്കുവെച്ച്കൊണ്ട് കുറിച്ചത് ഇങ്ങനെ- “ജെഎൻയു ആദ്യ പോസ്റ്റർ പുറത്ത്…ഏപ്രിൽ 5ന് റിലീസ്… വിദ്യാഭ്യാസ സ്ഥാപനത്തിന്റെ അടഞ്ഞ മതിലുകൾക്ക് പിന്നിൽ രാജ്യത്തെ തകർക്കാനുള്ള ഗൂഢാലോചന നടക്കുന്നു”.
ചിത്രം പ്രഖ്യാപിച്ചതിന് തൊട്ടുപിന്നാലെ, നെറ്റിസൺസ് അവരുടെ വ്യത്യസ്ത അഭിപ്രായങ്ങളും പ്രതികരണങ്ങളും സമൂഹ മാധ്യമങ്ങളിൽ പങ്കിട്ടു. ചിലർ ഇതിനെ ‘പ്രൊപ്പഗണ്ട’ എന്ന് വിളിച്ചപ്പോൾ, മറ്റുള്ളവർ അത് ‘ബ്ലോക്ക്ബസ്റ്റർ’ ആവുമെന്ന് പ്രഖ്യാപിച്ചു.
