ആലപ്പുഴ: കേരള ബാങ്കിലെ വിവിധ ശാഖകളില്‍ ഉപഭോക്താക്കള്‍ പണയം വെച്ച 335 ഗ്രാമോളംവരുന്ന സ്വര്‍ണം മോഷ്ടിച്ച കേസില്‍ കേരളാബാങ്കിന്റെ തന്നെ മുന്‍ ഏരിയാ മനേജര്‍ അറസ്റ്റില്‍. ചേര്‍ത്തല സ്വദേശിനിയായ കേരള ബാങ്ക് മുന്‍ ഏരിയാമാനേജര്‍ മീരാ മാത്യുവിനെയാണ് പൊലീസ് അറസ്റ്റ് ചെയ്തത്.
ഇവര്‍ ഏതാനും ദിവസങ്ങളായി ഒളിവിലായിരുന്നു. ബാങ്കിന്റെ നാല് ശാഖകളില്‍ ഉപഭോക്താക്കള്‍ പണയം വെച്ച സ്വര്‍ണ്ണമാണ് ഇവര്‍ മോഷ്ടിച്ചത്. പട്ടണക്കാട് പൊലീസാണ് അറസ്റ്റ് ചെയ്തത്.
ചേര്‍ത്തലയിലെ രണ്ട് ശാഖകള്‍, കേരളാ ബാങ്കിന്റെ പട്ടണക്കാട്, അര്‍ത്തുങ്കല്‍ ശാഖകള്‍ എന്നിവിടങ്ങളിലായി നാലു ശാഖകളിൽ നിന്നുള്ള പണയ സ്വര്‍ണമാണ് ഇവര്‍ മോഷ്ടിച്ചത്. ഇവര്‍ക്കെതിരെ വിവിധ സ്റ്റേഷനുകളില്‍ കേസുണ്ടായിരുന്നു.
ചേര്‍ത്തല നടക്കാവ് ശാഖയില്‍ നിന്നാണ് ഏറ്റവും കൂടുതല്‍ സ്വര്‍ണം (171.300 ഗ്രാം) നഷ്ടപ്പെട്ടത്. ചേര്‍ത്തല പ്രധാന ശാഖയില്‍ നിന്ന് 55.480 ഗ്രാമും പട്ടണക്കാട് ശാഖയില്‍നിന്ന് 102.300 ഗ്രാമും അര്‍ത്തുങ്കല്‍ ആറു ഗ്രാമും സ്വര്‍ണമാണ് മോഷ്ടിക്കപ്പെട്ടത്.ബാങ്കുകളുടെ ശാഖാ മാനേജർമാർ നൽകിയ പരാതിയിലാണ് കേസ്. 2023 ജൂൺ 7ന് മീരാ മാത്യുവിനെ സർവീസിൽ നിന്ന് സസ്പെൻഡ് ചെയ്തിരുന്നു. തുടർന്നാണ് ബാങ്ക് ശാഖകളിൽ നിന്ന് പൊലീസിൽ പരാതി നൽകിയത്. 12ന് പൊലീസ് മൊഴിയെടുക്കുകയും കേസ് രജിസ്റ്റർ ചെയ്യുകയുമായിരുന്നു.
ബാങ്കുകളിലെ പണയം വെച്ച സ്വര്‍ണം പരിശോധനക്കാന്‍ ചുമതലയുള്ള ഉദ്യോഗസ്ഥയായിരുന്നു ഏരിയാ മാനേജരായിരുന്നു മീര മാത്യു.കേരളാ ബാങ്കിന്റെ നാലു ശാഖകളില്‍ നിന്നായി 335.08 ഗ്രാം സ്വര്‍ണം നഷ്ടപ്പെട്ടതായാണ് പൊലീസ് റിപ്പോര്‍ട്ട്.
