ചെന്നൈ: അന്താരാഷ്‌ട്ര മയക്കുമരുന്ന് റാക്കറ്റിന്റെ ഭാഗവും ഡിഎംകെ നേതാവുമായിരുന്ന ജാഫര്‍ സാദിഖിനെതിരെ ഇ ഡി കേസ് എടുത്തു. മയക്കുമരുന്നു വില്പന വഴി വലിയ തോതില്‍ പണം സമ്പാദിച്ച പശ്ചാത്തലത്തില്‍, കള്ളപ്പണം വെളുപ്പിക്കലിലാണ് കേസ്. മയക്കുമരുന്ന് വ്യാപാരത്തില്‍ നിന്ന് നേടിയ പണം ഉപയോഗിച്ച് പ്രതി സ്ഥാവര-ജംഗമ വസ്തുക്കള്‍ വാങ്ങിക്കൂട്ടിയിട്ടുണ്ടെന്ന് കണ്ടെത്തയിട്ടുണ്ട്.
മാര്‍ച്ച് ഒന്‍പതിനാണ് സിനിമ നിര്‍മാതാവും ഡിഎംകെ നേതാവുമായിരുന്ന ജാഫര്‍ സാദിഖിനെ എന്‍സിബി അറസ്റ്റ് ചെയ്തത്. 2,000 കോടിയിലധികം വിലമതിക്കുന്ന 3,500 കിലോഗ്രാം സ്യൂഡോഫെഡ്രിനാണ് ജാഫര്‍ സാദിഖിന്റെ മാഫിയ വിദേശത്തേക്ക് കടത്തിയത്.
അറസ്റ്റിന് പിന്നാലെ എന്‍സിബി ഉദ്യോഗസ്ഥര്‍ക്ക് മുന്നില്‍ ജാഫര്‍ സാദിഖ് ഡിഎംകെ മന്ത്രി ഉദയനിധി സ്റ്റാലിനുമായുള്ള ബന്ധം വെളിപ്പെടുത്തിയിരുന്നു. ഉദയനിധി സ്റ്റാലിന് ഏഴുലക്ഷം രൂപ നല്കിയതായി സാദിഖ് എന്‍സിബി ഉദ്യോഗസ്ഥരോട് പറഞ്ഞു. പ്രളയ സഹായനിധി എന്ന പേരിലും പാര്‍ട്ടി ഫണ്ട് എന്ന പേരിലുമാണ് പണം നല്കിയത്.
കേസുമായി ബന്ധപ്പെട്ട് തമിഴ്‌നാട് മുഖ്യമന്ത്രിയുടെ മകനും മന്ത്രിയുമായ ഉദയനിധി സ്റ്റാലിനെ ചോദ്യം ചെയ്യാന്‍ വിളിപ്പിച്ചേക്കും. മുഖ്യമന്ത്രി സ്റ്റാലിനുമായുള്ള ജാഫര്‍ സാദിഖിന്റെ ചിത്രങ്ങളും പുറത്ത് വന്നിട്ടുണ്ട്. പ്രതി നിര്‍മിച്ച സിനിമ സംവിധാനം ചെയ്തത് സ്റ്റാലിന്റെ മരുമകളാണ്.
സ്റ്റാലിന് കുടുംബവും ജാഫര്‍ സാദിഖും തമ്മിലുള്ള അടുത്ത ബന്ധം പുറത്ത് വന്നതിന് പിന്നാലെ ഡിഎംകെ ‘മയക്കുമരുന്ന് വിപണന കഴകം’ ആയി മാറിയിരിക്കുന്നെന്ന് ബിജെപി വിമര്‍ശിച്ചു.
