ചെന്നൈ: റുപേ പ്രൈം വോളിബോള് ലീഗ് മൂന്നാം സീസണിലെ ആദ്യ റൗണ്ടില് ഒന്നാംസ്ഥാനം ഉറപ്പാക്കി കാലിക്കറ്റ് ഹീറോസ്. ഇന്നലെ ചെന്നൈ ബ്ലിറ്റ്സിനെ നേരിട്ടുള്ള സെറ്റുകള്ക്ക് തോല്പ്പിച്ചു. സ്കോര്: 15-13, 15-13, 15-12. തോല്വിയോടെ ചെന്നൈ പുറത്തായി. ഇതോടെ മുംബൈ മിറ്റിയോഴ്സ് സൂപ്പര് ഫൈവ്സിലെ ശേഷിക്കുന്ന സ്ഥാനം സ്വന്തമാക്കി. കാലിക്കറ്റിന്റെ ജെറൊം വിനിതാണ് കളിയിലെ താരം.
തുടക്കത്തില്തന്നെ മോഹന് ഉക്രപാണ്ഡ്യന് കാലിക്കറ്റിന്റെ അറ്റാക്കര്മാര്ക്ക് അവസരമൊരുക്കി. മിഡില് ബ്ലോക്കേഴ്സായ ഡാനിയലിനും വികാസിനുമാണ് ആക്രമണത്തിനായി ഉക്ര അവസരമൊരുക്കിയത്. ദിലിപിലൂടെയായിരുന്നു ചെന്നൈയുടെ പ്രത്യാക്രമണം. ജോയെലിന്റെ സൂപ്പര് സെര്വ് അവര്ക്ക് പ്രതീക്ഷ നല്കി. എന്നാല് ജെറൊമിന്റെ സ്പൈക്കുകള് കളി സന്തുലിതമാക്കി. ഒടുവില് ജെറൊമിന്റെ തകര്പ്പന് പ്രകടനം ചെന്നൈ പ്രതിരോധത്തെ തകര്ത്തു. കാലിക്കറ്റ് ആദ്യ സെറ്റ് അനായാസം സ്വന്തമാക്കുകയും ചെയ്തു.
ഉക്ര നിരന്തരം ജെറൊമിനായി അവസരമൊരുക്കികൊണ്ടിരുന്നു. കാലിക്കറ്റ് ക്യാപ്റ്റന് കടുത്ത ആക്രമണം കൊണ്ട് ചെന്നൈയെ പരീക്ഷിച്ചു. പെറൊറ്റോയുടെ ആക്രണാത്മകമായ സെര്വുകള് കളിയില് കാലിക്കറ്റിന്റെ ആധിപത്യം ഉറപ്പാക്കി. ഇതിനിടെ ജൊയെലിന്റെയും ദിലിപിന്റെയും മിടുക്കില് ചെന്നൈ കാലിക്കറ്റിന്റെ നിരന്തരമുള്ള ആക്രമണങ്ങള്ക്ക് ചെറുതായി തടയിട്ടു. പക്ഷേ കാര്യമുണ്ടായില്ല. മധ്യഭാഗത്ത്നിന്നുള്ള വികാസിന്റെ ഓള് റൗണ്ട് പ്രകടനം കാലിക്കറ്റിന് സമ്പൂര്ണ നിയന്ത്രണം നല്കി.
ലിബെറൊ രാമയുടെ പരിക്ക് ചെന്നൈക്ക് തിരിച്ചടിയായി. പകരക്കാരനായെത്തിയ പ്രഭയെ കാലിക്കറ്റിന്റെ അറ്റാക്കര്മാര് ലക്ഷ്യംവച്ചു. ചെന്നൈ പ്രതിരോധത്തിന് ജെറൊമിന്റെ നീക്കങ്ങളെ പ്രതിരോധിക്കാനായില്ല. ആതിയേഥര് പൊരുതാന്ശ്രമിച്ചു. പക്ഷേ, കാലിക്കറ്റ് ക്യാപ്റ്റന്റെ മികവിന് മുന്നില് തളര്ന്നു. കാലിക്കറ്റ് നേരിട്ടുള്ള സെറ്റുകളില് ജയം പിടിച്ചു. സൂപ്പര് ഫൈവ്സ് മത്സരങ്ങള് ഇന്ന് തുടങ്ങും.
