ഭുവനേശ്വര്: പുരിയിലെ ജഗന്നാഥ ക്ഷേത്രത്തില് അനധികൃതമായി കടന്ന ഒന്പത് ബംഗ്ലാദേശികള് അറസ്റ്റില്. വിശ്വഹിന്ദു പരിഷത്ത് പ്രവര്ത്തകരുടെ പരാതിയിലാണ് ഒഡീഷ പോലീസിന്റെ നടപടി. ആചാരങ്ങള് ലംഘിച്ച് ബംഗ്ലാദേശില് നിന്നുള്ളവര് ക്ഷേത്രത്തില് കയറിയത് ശ്രദ്ധയില്പ്പെട്ടതിനെ തുടര്ന്നാണ് വിഎച്ച്പി സിങ്ദ്വാര് പോലീസ് സ്റ്റേഷനില് പരാതി നല്കിയത്. ഞായറാഴ്ച വൈകിട്ടായിരുന്നു സംഭവം.
ബംഗ്ലാദേശികളെ അറസ്റ്റ് ചെയ്തുവെന്നും ചോദ്യം ചെയ്യല് പുരോഗമിക്കുകയാണെന്നും പുരി അഡീഷണല് എസ്പി സുശീല് മിശ്ര പറഞ്ഞു. ഇവരുടെ പാസ്പോര്ട്ടുകളും പിടിച്ചെടുത്തിട്ടുണ്ട്. ഒന്പത് പേരില് നാലുപേരെ ക്ഷേത്രത്തിനുള്ളില് നിന്നും അഞ്ച് പേരെ പുറത്ത് നിന്നുമാണ് പിടികൂടിയത്.
ഇവര് താമസിച്ച ഹോട്ടല് മുറികളും പരിശോധിച്ചു. ഇവരില് ഒരാള് ഹിന്ദുവാണെന്ന് പരിശോധനയില് നിന്ന് വ്യക്തമായതായും സംഭവത്തില് വിശദമായ അന്വേഷണം നടത്തുമെന്നും അദ്ദേഹം കൂട്ടിച്ചേര്ത്തു.
