മേദിനിപൂര്: ബംഗാളിന്റെ മുക്കിലും മൂലയിലും കള്ളന്മാരും പീഡകരുമാണെന്നും ഭരണകക്ഷികള് അവരുടെ പാര്ട്ടി പതാകയാല് ഇവരെ സംരക്ഷിച്ചു നിര്ത്തിയിരിക്കുകയാണെന്നും ബിജെപി എംപി ദിലീപ് ഘോഷ്. സന്ദേശ്ഖാലി വിഷയത്തില് മാധ്യമങ്ങളോട് പ്രതികരിക്കുകയായിരുന്നു അദ്ദേഹം.
കുറ്റവാളിയും ബലാത്സംഗകേസിലെ പ്രതിയുമായ ഷാജഹാന് ഷെയ്ഖിനെ രണ്ട് മാസത്തോളമാണ് ടിഎംസി സംരക്ഷിച്ചത്. ഷാജഹാന് ഷെയ്ഖിനെതിരെ നടപടി സ്വീകരിക്കണമെന്നാവശ്യപ്പെട്ട് കഴിഞ്ഞ ദിവസങ്ങളില് സന്ദേശ്ഖാലിയില് വന് പ്രതിഷേധങ്ങളാണ് അരങ്ങേറിയത്. പ്രതിഷേധം കടുക്കുകയും മാധ്യമങ്ങളില് ഉള്പ്പടെ വാര്ത്ത പ്രചരിക്കുകയും ചര്ച്ചയായതോടെ ഇയാളെ അറസ്റ്റ് ചെയ്യുകയല്ലാതെ മറ്റൊരു വഴിയില്ലാത്തവിധം പോലീസ് സമ്മര്ദ്ദത്തിലാവുകയായിരുന്നു.
ഷാജഹാനെതിരെ ആരോപണം ഉയര്ന്ന് മാസങ്ങള് പിന്നിട്ടിട്ടും അറസ്റ്റിലായി മണിക്കൂറുകള്ക്ക് ശേഷമാണ് ഇയാളെ ടിഎംസിയില് നിന്ന സസ്പെന്ഡ് പോലും ചെയ്തത്. ടിഎംസി ബംഗാളിനെ നശിപ്പിച്ചു. ജനങ്ങളില് നിന്നും സ്ത്രീകളില് നിന്നും ഇവരെല്ലാം കൊള്ളയടിച്ചു. ആര്ട്ടിക്കിള് 370 എടുത്ത് മാറ്റി കശ്മീരില് ശാന്തത കൊണ്ടുവരാന് പ്രധാനമന്ത്രിക്ക് സാധിച്ചിട്ടുണ്ടെങ്കില് അതുപോലെ ബംഗാളിനെ ശാന്തമാക്കാന് സാധിക്കും. സംസ്ഥാനത്തെ സാധാരണഗതിയിലാക്കുന്നതിന് അദ്ദേഹത്തിന് വെറും രണ്ട് മിനിട്ട് മാത്രം മതിയാകുമെന്നും ദിലീപ് ഘോഷ് കൂട്ടിച്ചേര്ത്തു.
