കൊച്ചി: ഭാരതം ആദ്യമായി നിര്മിച്ച ഹൈഡ്രജന് ഇന്ധന യാത്രാ ബോട്ട് ഗംഗാനദിക്കുള്ള കൊച്ചിയുടെ സമ്മാനമാകും. നിര്മിച്ചതു കൊച്ചിന് കപ്പല്ശാലയിലാണെങ്കിലും ഇതില് സഞ്ചരിക്കാനുള്ള ഭാഗ്യം വാരാണസിക്കാര്ക്കാണ്. വാരാണസി ഇന്ലാന്ഡ് വാട്ടര് അതോറിറ്റിക്ക് ഒരു മാസത്തിനു ശേഷം ബോട്ട് കൈമാറുമെന്നു കപ്പല്ശാല അധികൃതര് ജന്മഭൂമിയോടു പറഞ്ഞു.
ഇന്നലെ പ്രധാനമന്ത്രി നരേന്ദ്ര മോദി തമിഴ്നാട്ടിലെ തൂത്തുക്കുടിയില്നിന്ന് ബോട്ടിന്റെ ഫഌഗ് ഓഫ് ഓണ്ലൈനായി നിര്വഹിച്ചതിന് കൊച്ചിന് കപ്പല്ശാലയില് ആയിരങ്ങള് സാക്ഷികളായി. ബോട്ട് സര്വീസ് നടത്താന് പോകുന്ന വാരാണസിയിലെ എംപി കൂടിയാണ് നരേന്ദ്ര മോദിയെന്ന കൗതുകവുമുണ്ട്.
പ്രകൃതിയിലേക്ക് മാലിന്യമൊന്നും തള്ളാതെ, പൂര്ണമായി ഹൈഡ്രജന് സെല്ലില് പ്രവര്ത്തിക്കുന്ന ആദ്യ ബോട്ടായതിനാല് സ്കില്, കപ്പാസിറ്റി ടെസ്റ്റുകള് പല തവണ നടത്തി വിജയിച്ച ശേഷമേ ഇവ സര്വീസിനായി വിട്ടു കൊടുക്കൂവെന്നു കപ്പല്ശാല അധികൃതര് പറഞ്ഞു.
കൊച്ചി കായലില് നടത്തിയ ഓപ്പറേഷന് ടെസ്റ്റുകളെല്ലാം ഇതുവരെ വിജയമാണ്. 24 മീറ്ററാണ് നീളം. 14 കോടി നിര്മാണച്ചെലവായെങ്കിലും, ഓപ്പറേഷനല് ചെലവില്ലാത്തതും അറ്റകുറ്റപ്പണിക്കുറവും പരിസ്ഥിതി സൗഹൃദ മൂല്യവും കണക്കാക്കുമ്പോള് വര്ഷങ്ങളിലൂടെ ഈ തുക ലാഭമായി മാറുമെന്നാണ് കപ്പല്ശാലയുടെ വിലയിരുത്തല്. 50 സീറ്റുള്ള ബോട്ട് ഗംഗാനദിയില് വിജയകരമായി സര്വീസ് നടത്തുകയാണെങ്കില് ഭാവിയില് ഹൈഡ്രജന് സാങ്കേതികവിദ്യയിലേക്കു മാറാനാണ് ഭാരതം ആഗ്രഹിക്കുന്നത്.
2070ല് ഭാരതം ‘സീറോ എമിഷന്’ ആകുക എന്ന കേന്ദ്ര സര്ക്കാര് പദ്ധതിയുടെ ഭാഗമായാണ് ഹൈഡ്രജന് ബോട്ട് നിര്മാണം. വെറും 18 മാസം കൊണ്ടാണ് കൊച്ചി കപ്പല്ശാല ഇതു പണിതത്. പ്രത്യേക ബാര്ജിലാണ് ബോട്ട് വാരാണസിയിലേക്കു കൊണ്ടുപോകുക. സാധാരണ ബാര്ജില് കൊണ്ടുപോയാല് രാമേശ്വരത്തെ പാമ്പന് പാലത്തിനടിയില് മാര്ഗതടസ്സമുണ്ടാകാനിടയുള്ളതിനാലാണ് ഇതിനായി പ്രത്യേക ബാര്ജ് തയാറാക്കുന്നത്.
ജന്മഭൂമി ഓണ്ലൈന്