കോട്ടയം : മുണ്ടക്കയം പുഞ്ചവയലില്‍ ദമ്പതികളെ അയല്‍വാസി വെട്ടി പരിക്കേല്‍പ്പിച്ചു.പുഞ്ചവയല്‍ 504 കണ്ടംകേരി തോമസ് (77), ഭാര്യ ഓമന (55) എന്നിവര്‍ക്കാണ് വെട്ടേറ്റത്.
കുളിക്കാനായി പോകവെ അയല്‍വാസി കൊച്ചുമോന്‍ ആക്രമിക്കുകയായിരുന്നുവെന്നാണ് ദമ്പതികള്‍ പൊലീസിനു മൊഴി നല്കിയത്. തോമസിന് തലയിലും ഓമനയ്‌ക്ക് മുഖത്തുമാണ് വെട്ടേറ്റത്.
ഇവരുടെ നിലവിളി കേട്ട് ഓടിയെത്തിയ നാട്ടുകാരാണ് ആശുപത്രിയില്‍ എത്തിച്ചത്. മുണ്ടക്കയത്തെയും കാഞ്ഞിരപ്പള്ളിയിലെയും സ്വകാര്യആശുപത്രികളില്‍ പ്രവേശിപ്പിച്ച ശേഷം പിന്നീട് കോട്ടയം മെഡിക്കല്‍ കോളജിലേക്ക് മാറ്റി.
ദമ്പതികളെ ആക്രമിച്ച കൊച്ചുമോനു വേണ്ടിയുള്ള അന്വേഷണം തുടരുകയാണെന്ന് പൊലീസ് അറിയിച്ചു.
