അടൂര്‍: കേന്ദ്രസര്‍ക്കാരിന്റെ ദേശീയ ഗ്രാമീണ തൊഴിലുറപ്പ് ജോലി ചെയ്യാതെ ഹാജര്‍ രേഖപ്പെടുത്തിയ ശേഷം ഡിവൈഎഫ്‌ഐയുടെ മനുഷ്യച്ചങ്ങലയ്‌ക്കു പോയ മൂന്ന് മേറ്റുമാരെ സസ്‌പെന്‍ഡ് ചെയ്ത് ഓംബുഡ്‌സ്മാന്റെ ഉത്തരവ്. ഒരു വര്‍ഷത്തേക്കാണ് സസ്‌പെന്‍ഷന്‍.
ഒപ്പം 70 തൊഴിലാളികള്‍ക്കും ആ ദിവസത്തെ വേതനം കുറയ്‌ക്കണമെന്നും ഉത്തരവില്‍ പറയുന്നു. ഓംബുഡ്‌സ്മാന്‍ രാധാകൃഷ്ണക്കുറുപ്പിന്റേതാണ് ഉത്തരവ്.
പള്ളിക്കല്‍ പഞ്ചായത്തിലെ മേറ്റുമാരായ ഒ. ലേഖ, എസ്. സുനിത, ടി. ശശികല എന്നിവരെയാണ് സസ്‌പെന്‍ഡ് ചെയ്തത്. ജനുവരി 20ന് പള്ളിക്കല്‍ പഞ്ചായത്തിലെ 20-ാം വാര്‍ഡിലാണ് സംഭവം. പദ്ധതിയുടെ മേല്‍നോട്ടം വഹിക്കേണ്ട മേറ്റുമാരും തൊഴിലാളികളും ജോലിസ്ഥലത്തെത്തി ഹാജര്‍ രേഖപ്പെടുത്തി ഫോട്ടോയും എടുത്തതിനുശേഷം മനുഷ്യച്ചങ്ങലയ്ക്ക് പോകുകയായിരുന്നു.
ഇതിനെതിരെ ബിജെപി നേതാക്കള്‍ നല്കിയ പരാതിയിലാണ് അന്വേഷണം. ഓംബുഡ്‌സ്മാന്റെ നിര്‍ദേശപ്രകാരം ബിഡിഒ നടത്തിയ അന്വേഷണത്തില്‍ ഗുരുതരമായ കൃത്യവിലോപം കണ്ടെത്തിയിരുന്നു.
