ആലപ്പുഴ: വിവാഹനിശ്ചയം കഴിഞ്ഞ സിപിഎം പ്രവര്‍ത്തക ആത്മഹത്യ ചെയ്ത സംഭവത്തില്‍ പ്രതിശ്രുതവരനായ ഡിവൈഎഫ്‌ഐ നേതാവ് അറസ്റ്റില്‍. ഡിവൈഎഫ്‌ഐ മേഖല സെക്രട്ടറിയും, സിപിഎം ലോക്കല്‍ കമ്മറ്റിയംഗവുമായ കാവാലം പത്തില്‍ച്ചിറ വീട്ടില്‍ അനന്തുവി(26)നെയാണ് കൈനടി പോലീസ് അറസ്റ്റ് ചെയ്തത്. ആത്മഹത്യപ്രേരണ കുറ്റത്തിനാണ് അറസ്റ്റ്. പാര്‍ട്ടി പ്രവര്‍ത്തകയും നിയമവിദ്യാര്‍ത്ഥിനിയുമായ കാവാലം പഞ്ചായത്ത് ലിസിയോയില്‍ രണ്ടരപറയില്‍ തിലകന്റെ മകള്‍ ആതിര തിലകാ(25)ണ് ജീവനൊടുക്കിയത്.
ആതിര, പ്രതിയുമായി പ്രണയത്തിലായിരുന്നു. ഇരു വീട്ടുകാരും ചേര്‍ന്ന് 2021 നവംബര്‍ അഞ്ചിന് മോതിരം മാറ്റചടങ്ങ് നടത്തിയിരുന്നു. കഴിഞ്ഞ ജനുവരി അഞ്ചിന് അനന്തു, ആതിരയുടെ വീട്ടില്‍വന്ന ആതിരയുമായി വഴക്കിടുകയും തുടര്‍ന്ന് ശാരീരികമായി ഉപദ്രവിക്കുകയും ചെയ്തു. മനോവിഷമത്തില്‍ യുവതി ആത്മഹത്യചെയ്യുകയായിരുന്നു.
സംഭവം നടന്ന് ഒരു മാസത്തിലേറെയായിട്ടും പ്രതിയെ അറസ്റ്റ് ചെയ്യാത്തതില്‍ വ്യാപക പ്രതിഷേധം ഉയര്‍ന്നിരുന്നു. ബിജെപിയുടെ നേതൃത്വത്തില്‍ കൈനടി പോലീസ് സ്റ്റേഷനിലേക്ക് മാര്‍ച്ച് നടത്തി. സ്റ്റേഷനുമുന്നില്‍ അനിശ്ചിതകാല ഉപവാസ സമരവും പ്രഖ്യാപിച്ചിരുന്നു. ഈ സാഹചര്യത്തിലാണ് പ്രതിയെ അറസ്റ്റ് ചെയ്തത്. പ്രതിയെ ഇന്ന് കോടതിയില്‍ ഹാജരാക്കും.
