എറണാകുളം: മലയാറ്റൂരില് കിണറ്റില് വീണ കാട്ടാന കുട്ടിയെ രക്ഷിച്ചു. മൂന്ന് മണിക്കൂര് നീണ്ട പരിശ്രമത്തിനൊടുവിലാണ് രക്ഷ പ്രവര്ത്തകര് ആനയെ കരയ്ക്കു കയറ്റിയത്.
മൂന്ന് മണിക്കൂര് നീണ്ട പരിശ്രമത്തിനൊടുവിലാണ് കിണറ്റില് വീണ കാട്ടാന കുട്ടിയെ വനപാലകര് രക്ഷിച്ചത്. എറണാകുളം മലയാറ്റൂരില് ഇന്ന് രാവിലെയാണ് ഇല്ലിത്തോടില് റബര്തോട്ടത്തിലെ കിണറ്റില് കുട്ടിയാന വീണത്. കിണറിനോട് ചേര്ന്ന് കിടന്ന സ്ഥലത്തെ മണ്ണ് ജെസിബി ഉപയോഗിച്ച് നീക്കിയായിരുന്നു രക്ഷാപ്രവര്ത്തനം നടത്തിയത്.
കുട്ടിയാന കിണറ്റില് വീണതോടെ കിണറിന് സമീപത്ത് നിന്ന് മാറാതെ കാട്ടാനക്കൂട്ടം റബര് തോട്ടത്തില് നിലയുറപ്പിച്ചിരുന്നു. ഇത് രക്ഷാപ്രവര്ത്തനത്തിന് തടസമായതോടെ വനപാലകര് ആനക്കൂട്ടത്തെ സ്ഥലത്ത് നിന്നും തുരത്താനുള്ള ശ്രമം നടത്തുകയും ചെയ്തു.
