തിരുവനന്തപുരം: സമൂഹമാധ്യമങ്ങളില് വീട്ടിലിരുന്ന് ലക്ഷങ്ങള് നേടാം എന്ന മോഹനവാഗ്ദാനവുമായി നിരവധി ജോലി വാഗ്ദാനങ്ങളാണ് ദിനംപ്രതി വരുന്നത്. എത്ര മുന്നറിയിപ്പുകള് കിട്ടിയാലും വീണ്ടും ഇത്തരം വാഗ്ദാനങ്ങളില്പ്പെട്ട് സാമ്പത്തിക നഷ്ടം വരുത്തിവയ്ക്കുന്നവര് നിരവധിയാണ്.
കേരള പോലീസ് വീണ്ടും നിങ്ങളുടെ ശ്രദ്ധയില് കൊണ്ടുവരുന്നത് പുതിയ തട്ടിപ്പാണ്. പെന്സില് കമ്പനികളില് പാക്കിംഗ് ജോലിയും വീട്ടിലിരുന്ന് ലക്ഷങ്ങള് സമ്പാദിക്കാം എന്ന വിധത്തില് സമൂഹമാധ്യങ്ങളില് പ്രത്യക്ഷപ്പെട്ട പുതിയ തട്ടിപ്പിനെക്കുറിച്ചാണ്.
പോലീസ് അറിയിപ്പ് ഇങ്ങനെ:
പ്രമുഖ പെന്സില് കമ്പനികളില് പാക്കിംഗ് ജോലി, വീട്ടിലിരുന്നു ലക്ഷങ്ങള് നേടാമെന്ന് വാഗ്ദാനവുമായി സമൂഹമാധ്യമങ്ങളില് വരുന്ന പരസ്യം തട്ടിപ്പാണ്.
ഇത്തരം ജോലി വാഗ്ദാനം ചെയ്തുള്ള പരസ്യങ്ങളില് വിളിക്കേണ്ട മൊബൈല് നമ്പര് വരെ നല്കിയാണ് തട്ടിപ്പ്. പല പോസ്റ്റുകളിലും പല നമ്പറുകള് ആണ് കോണ്ടാക്റ്റ് നമ്പറായി കൊടുത്തിരിക്കുന്നത്. ഉയര്ന്ന ശമ്പളം പ്രതീക്ഷിച്ച് ജോലിക്ക് വേണ്ടി വാട്സാപ് നമ്പറില് ബന്ധപ്പെടുന്നവരോട് ഗൂഗിള് പേ വഴിയോ ഫോണ്പേ വഴിയോ രജിസ്ട്രേഷന് ഫീസ് ആവശ്യപ്പെടും.
അടുത്ത പടി ഫോട്ടോ വാങ്ങി കമ്പനിയുടെതെന്ന രീതിയില് വ്യാജ തിരിച്ചറിയല് കാര്ഡ് അയച്ചുകൊടുക്കും. മേല്വിലാസം വെരിഫൈ ചെയ്യാനും കൊറിയര് ചാര്ജ്ജായി പണം ആവശ്യപ്പെട്ടാണ് തട്ടിപ്പ് നടത്തുന്നത്. നടരാജ് പെന്സിലിന്റെ പേരില് ജോലി വാഗ്ദാനം ചെയ്യുന്ന പോസ്റ്റുകള് തട്ടിപ്പാണ് എന്ന് കമ്പനി തന്നെ വ്യക്തമാക്കിയിട്ടുണ്ട്.
ഓണ്ലൈന് സാമ്പത്തികത്തട്ടിപ്പിനിരയായാല് ഒരുമണിക്കൂറിനകം [ GOLDEN HOUR ] തന്നെ വിവരം 1930 ല് അറിയിക്കുക. എത്രയും നേരത്തെ റിപ്പോര്ട്ട് ചെയ്താല് തട്ടിപ്പിന് ഇരയായ വ്യക്തിക്ക് നഷ്ടപ്പെട്ട തുക തിരിച്ചു ലഭിക്കാനുള്ള സാധ്യത കൂടുതലാണ്.www cybercrime gov in എന്ന വെബ്സൈറ്റിലും പരാതി രജിസ്റ്റര് ചെയ്യാവുന്നതാണ്.
