കൊല്ലം : യു എസിലെ കാലിഫോര്ണിയയില് സാന് മറ്റേയോയില് താമസിക്കുന്ന മലയാളി കുടുംബത്തിലെ 4 പേരെ മരിച്ച നിലയില് കണ്ടെത്തി.കൊല്ലം സ്വദേശികളാണ് ഇവര്. ഫാത്തിമാമാതാ കോളജ് മുന് പ്രിന്സിപ്പല് പട്ടത്താനം വികാസ് നഗര് 57ല് ഡോ.ജി.ഹെന്റിയുടെ മകന് ആനന്ദ് സുജിത് ഹെന്റി (42), ഭാര്യ ആലീസ് പ്രിയങ്ക (40), ഇരട്ടക്കുട്ടികളായ നോഹ, നെയ്തന് (4) എന്നിവരെയാണ് മരിച്ചനിലയില് കണ്ടെത്തിയത്.
തണുപ്പിനെ പ്രതിരോധിക്കാന് ഉപയോഗിച്ച ഹീറ്ററില്നിന്നുയര്ന്ന വാതകം ശ്വസിച്ചാകാം മരണമെന്നാണ് സംശയം. അമേരിക്കന് സമയം 12ന് രാവിലെ 9.15നാണ് പൊലീസ് മൃതദേഹങ്ങള് കണ്ടെത്തിയത്.
ആലീസ് പ്രിയങ്ക കിളിയല്ലൂര് വെളിയില് വീട്ടില് പരേതനായ ബെന്സിഗര്-ജൂലിയറ്റ് ബെന്സിഗര് ദമ്പതികളുടെ ഏക മകളാണ് . ആലീസിന്റെ മാതാവ് ജൂലിയറ്റ് അമേരിക്കയിലായിരുന്നു. രണ്ട് ദിവസം മുമ്പാണ് തിരികെ വന്നത്. 12ന് രാവിലെ തിരുവനന്തപുരം വിമാനത്താവളത്തിലെത്തി ആലീസ് പ്രിയങ്കയെ ഫോണില് ബന്ധപ്പെട്ടിരുന്നു. കൊല്ലത്തെ വീട്ടിലെത്തിയശേഷം വാട്സാപ് സന്ദേശം ഇരുവര്ക്കും അയച്ചു. ഒരാള് മാത്രമാണ് സന്ദേശം കണ്ടത്. തുടര്ന്ന് അമേരിക്കയിലെ ബന്ധുവിനെ ജൂലിയറ്റ് വിവരം അറിയിച്ച പ്രകാരം അദ്ദേഹം മറ്റൊരു സുഹൃത്ത് മുഖേന അന്വേഷിച്ചു. ആനന്ദിന്റെ വീടിനു പുറത്ത് എത്തിയ സുഹൃത്തിനു സംശയം തോന്നിയാണ് പൊലീസില് വിവരം അറിയിച്ചത്. പൊലീസ് എത്തി പൂട്ടു തുറന്നപ്പോഴാണ് നാലു പേരെയും മരിച്ച നിലയില് കണ്ടെത്തിയത്.
പോസ്റ്റ്മോര്ട്ടം റിപ്പോര്ട്ട് വന്നാല് മാത്രമേ മരണകാരണം വ്യക്തമാകൂവെന്ന് സാന് മറ്റേയോ പൊലീസ് പറഞ്ഞു. ഗൂഗിളില് ജോലി ചെയ്യുകയായിരുന്ന ആനന്ദ് അടുത്തിടെ ജോലി രാജിവച്ചു സ്റ്റാര്ട്ടപ് തുടങ്ങിയിരുന്നു. ആലീസ് പ്രിയങ്ക സീനിയര് അനലിസ്റ്റായി ജോലി ചെയ്യുകയായിരുന്നു. ഏഴു വര്ഷം മുന്പാണ് കുടുംബം അമേരിക്കയിലേക്കു പോയത്. കുട്ടികള് അമേരിക്കയിലാണ് ജനിച്ചത്.
