കൊച്ചി: മുഖ്യമന്ത്രി പിണറായി വിജയന്റെ മകൾ വീണയുടെ കമ്പനിയായ എക്സാലോജിക്കിന് സിഎംആര്എല്ലുമായുള്ള സാമ്പത്തിക ഇടപാടില് എക്സാലോജിക്ക് കമ്പനിക്ക് സമൻസ് അയച്ച് എസ്എഫ്ഐഒ. കമ്പനിയുടെ സേവനം, സാമ്പത്തിക ഇടപാടുകൾ എന്നിവ സംബന്ധിച്ച രേഖകൾ ഹാജരാക്കാന് ആവശ്യപ്പെട്ടാണ് സമന്സ് അയച്ചിരിക്കുന്നത്.
എസ്എഫ്ഐഒ അന്വേഷണം സ്റ്റേ ചെയ്യണമെന്ന് ആവശ്യപ്പെട്ട് വീണ കര്ണാടക ഹൈക്കോടതിയില് ഹര്ജി നല്കിയിരുന്നു. ഇതിനിടെയാണ് സമന്സ് നല്കിയത്. എക്സാലോജിക്-സിഎംആര്എല് ഇടപാടുകള് സംബന്ധിച്ച രേഖകള് ആവശ്യപ്പെട്ടാണ് അന്വേഷണ ഏജന്സി സമന്സ് നല്കിയിരിക്കുന്നത്. കര്ണാടക ഹൈക്കോടതിയില് സമര്പ്പിച്ച രേഖകള്ക്കൊപ്പം സമന്സും ഹാജരാക്കിയിട്ടുണ്ട്. തിങ്കളാഴ്ചയാണ് കര്ണാടക ഹൈക്കോടതി വീണയുടെ ഹര്ജി പരിഗണിക്കുക. രാവിലെ 10.30 ന് ജസ്റ്റിസ് എം നാഗപ്രസന്നയുടെ ബെഞ്ചായിരിക്കും ഹര്ജി പരിഗണിക്കുക.
സിഎംആര്എല്ലില് പരിശോധന നടത്തിയപ്പോഴും കെഎസ്ഐഡിസിയില് പരിശോധന നടത്തിയപ്പോഴും എസ്എഫ്ഐഒ ഉദ്യോഗസ്ഥര് രേഖകള് ആവശ്യപ്പെട്ട് സമന്സ് അയച്ചിരുന്നു. കെഎസ്ഐഡിസിയിലെ പരിശോധന പൂര്ത്തിയായതിന് പിന്നാലെ എക്സാലോജികിനും സമാനമായ രീതിയില് എസ്എഫ്ഐഒ സമന്സ് അയച്ചു. സമൻസ് ലഭിച്ചതിന് പിന്നാലെയാണ് എക്സാലോജിക്സ് കോടതിയിലേക്ക് നീങ്ങിയത്.
അന്വേഷണം പ്രഖ്യാപിച്ചുള്ള ഉത്തരവിന് ആധാരമായ വിവരങ്ങള് ലഭ്യമാക്കണമെന്നും തുടര്നടപടികള് സ്റ്റേ ചെയ്യണമെന്നും എക്സാലോജിക്ക് ഹര്ജിയില് ആവശ്യപ്പെടുന്നുണ്ട്. കേന്ദ്ര സര്ക്കാറിനെയും എസ്എഫ്ഐഒ ഡയറക്ടറെയും എതിര് കക്ഷികളാക്കിയാണ് എക്സാലോജിക്കിന്റെ ഹര്ജി. ആദായ നികുതി ഇന്ട്രിംസെറ്റില്മെന്റ് ബോര്ഡിന്റെ ഉത്തരവും ആര്ഒസിയുടെ ഗുരുതര കണ്ടെത്തലുകള് പുറത്തുവന്നതോടെയാണ് എസ്എഫ്ഐഒ അന്വേഷണം എത്തുന്നത്.
