തിരുവനന്തപുരം: ക്രൈസ്തവ വിഭാഗത്തോട് സംസ്ഥാന സര്ക്കാര് കാണിക്കുന്ന അവഗണനയ്ക്കെതിരെ കേരള കൗണ്സില് ഓഫ് ചര്ച്ചസ്(കെസിസി)യുടെ നേതൃത്വത്തില് സെക്രട്ടേറിയറ്റിലേക്ക് വന് പ്രതിഷേധം.
ജസ്റ്റിസ് ജെ.ബി.കോശി കമ്മിഷന് റിപ്പോര്ട്ട് ശിപാര്ശകള് ഉടന് കേരളത്തില് നടപ്പിലാക്കണമെന്ന് ആവശ്യപ്പെട്ട് ക്രൈസ്തവ അവകാശ നീതിയാത്രയുടെ സമാപന പ്രതിഷേധത്തില് അണി നിരന്നത് ആയിരക്കണക്കിന് വിശ്വാസികള്. പൂര്ണസമയ സുവിശേഷ പ്രവര്ത്തകര്ക്ക് ക്ഷേമനിധി അനുവദിക്കണമെന്നും ദലിത് ക്രൈസ്തവ വിദ്യാര്ത്ഥികളുടെ വെട്ടിക്കുറച്ച വിദ്യാഭ്യാസ ആനുകൂല്യങ്ങള് പുനസ്ഥാപിക്കണമെന്നും പ്രതിഷേധ സമരം ഉദ്ഘാടനം ചെയ്ത നാഷണല് കൗണ്സില് ഓഫ് ചര്ച്ചസ് പ്രസിഡന്റ് ഡോ. ഗീവര്ഗീസ് മാര് യൂലിയോസ് മെത്രാപ്പോലീത്ത ആവശ്യപ്പെട്ടു. കെ.ടി. ജലീല് മന്ത്രിയായിരുന്നപ്പോള് സംസ്ഥാന ന്യൂനപക്ഷ കമ്മിഷനില് ക്രിസ്ത്യാനികളെ അവഗണിച്ചുവെന്നും ന്യൂനപക്ഷങ്ങള്ക്കുള്ള ആനുകൂല്യങ്ങള്ക്ക് ഒരു മതത്തെ മാത്രം അധികമായി പരിഗണിച്ചുവെന്ന് സാല്വേഷന് ആര്മി ടെറിട്ടോറിയല് കമാന്ഡര് കേണല് ജോണ് വില്യം പോളിമെറ്റ്ല പറഞ്ഞു.
ശശി തരൂര് എംപി, ജാഥാ ക്യാപ്റ്റന് കെസിസി ജനറല് സെക്രട്ടറി ഡോ. പ്രകാശ് പി. തോമസ്, വൈസ് പ്രസിഡന്റ് ഷിബി പീറ്റര്, ട്രഷറര് ഡോ. ടി.ഐ. ജെയിംസ്, വിവിധ സഭാ മേലധ്യക്ഷന്ന്മാരായ മാത്യൂസ് മാര് സില്വാനിയോസ് എപ്പിസ്ക്കോപ്പ, ബിഷപ്പ് ഡോ. ജോര്ജ് ഈപ്പന്, ബിഷപ്പ് ഡോ. സെല്വ ദാസ് പ്രമോദ്, ബിഷപ്പ് ഡോ. ഓസ്റ്റിന് എം.എ. പോള്, ലൂഥറന് സഭ സിനഡ് പ്രസിഡന്റ് മോഹനന് മാനുവേല്, ഇസിഐ ബിഷപ്പ് കമ്മിസറി ഹെന്ട്രി ഡി.ദാവീദ്, കെസിസി ക്ലര്ജി കമ്മീഷന് ചെയര്മാന് എ.ആര്. നോബിള് എന്നിവര് സംസാരിച്ചു.
ജനസംഖ്യാനുപാതിക സംവരണം ഏര്പ്പെടുത്തുക തുടങ്ങി വിവിധ ആവശ്യങ്ങള് ഉന്നയിച്ച് ജനുവരി 29ന് തിരുവല്ലയില് നിന്ന് കാല്നടയാത്രയായാണ് നീതിയാത്ര സെക്രട്ടേറിയറ്റിനു മുന്നില് എത്തിയത്. സാല്വേഷന് ആര്മി ചീഫ് സെക്രട്ടറി ലെഫ്റ്റ് കേണല് ദാനിയേല് ജെ. രാജ്, പേഴ്സണല് സെക്രട്ടറി ലെഫ്റ്റ് കേണല് സജു ദാനിയേല്, എല്.ടി.പവിത്ര സിങ്, കെസിസി വനിതാ കമ്മിഷന് ചെയര്മാന് ധന്യാ ജോസ്, ക്ലര്ജി കമ്മിഷന് ജില്ലാ ചെയര്മാന് ഫാ. സജി മേക്കാട്ട്, ക്യാപ്റ്റന് സ്റ്റീഫന്സണ്, ഷിബു. കെ, ഡോ. ജെ ഡബ്ല്യു. പ്രകാശ് തുടങ്ങിയവര് നേതൃത്വം നല്കി.
