കൊല്ലം: ശാസ്താംകോട്ടയില് കോളേജ് വിദ്യാര്ത്ഥിനിയും എസ്എഫ്ഐ പ്രവര്ത്തകയുമായ യുവതിയെ വിവാഹ വാഗ്ദാനം നല്കി പീഡിപ്പിക്കുകയും ഒമ്പത് ലക്ഷം രൂപ തട്ടുകയും ചെയ്ത കേസില് ഡിവൈഎഫ്ഐ നേതാവ് അറസ്റ്റില്. പടിഞ്ഞാറേ കല്ലട കോയിക്കല് ഭാഗം സ്വദേശി ഡിവൈഎഫ്ഐ യൂണിറ്റ് സെക്രട്ടറി വിശാഖാണ് അറസ്റ്റിലായത്. ബലാത്സംഗം, പട്ടികജാതി പീഡനം, വഞ്ചന എന്നീ വകുപ്പുകള് പ്രകാരമാണ് ഇയാള്ക്കെതിരെ കേസ്.
ശനിയാഴ്ചയാണ് പെണ്കുട്ടി ശാസ്താംകോട്ട പൊലീസില് പരാതി നല്കിയത്. വിശാഖ് പെണ്കുട്ടിയുമായി അടുപ്പത്തിലാകുന്നത് 2022 ഒക്ടോബറിലാണ്. എസ്എഫ്ഐയുടെ പരിപാടിക്കിടെയാണ് ഇരുവരും പരിചയപ്പെടുന്നത്. പിന്നീട് ഇവര് പ്രണയത്തിലായി.
വിവാഹം കഴിക്കാമെന്ന് വിശാഖ് ഉറപ്പ് നല്കിയ പ്രകാരം പിന്നീട് പലപ്പോഴായി ഒമ്പത് ലക്ഷം രൂപ പെണ്കുട്ടി സ്കൂള് അധ്യാപികയായ അമ്മയുടെ ഗൂഗിള് പേ വഴി കൈമാറി. വിശാഖിന്റെ ഇരുചക്ര വാഹനത്തിന്റെ തവണകള് അടച്ചത് പെണ്കുട്ടിയാണ്.പെണ്കുട്ടിയുടെ മാല പണയം വയ്ച്ചും അതിന്റെ പണം പെണ്കുട്ടിയെ കൊണ്ട് തന്നെ അടപ്പിച്ചും പല പ്രാവശ്യം കബളിപ്പിച്ചു.
മൂന്ന് ലക്ഷം രൂപ നേരിട്ട് കൈമാറിയിട്ടുണ്ടെന്നും പെണ്കുട്ടി പറഞ്ഞു. വിശാഖ് സ്ഥിരം മദ്യപാനിയാണ്. ശാസ്താംകോട്ട പൊലീസില് അടിപിടി കേസുണ്ട്. ഇതിനിടെ മറ്റൊരു പെണ്കുട്ടിയുമായി വിശാഖ് അടുപ്പത്തിലായതോടെയാണ് എസ്എഫ്ഐ പ്രവര്ത്തക പൊലീസിനെ സമീപിച്ചത്. സമാനമായ മറ്റൊരു പരാതിയും വിശാഖിനെതിരെയുണ്ടായിരുന്നെങ്കിലും കേസ് ഒത്തുതീര്പ്പാക്കി.
