കൂത്താട്ടുകുളം: ഈ മാര്ച്ചോടെ എല്ലാ ഗ്രാമീണ ഭവനങ്ങളിലും പൈപ്പുവഴി ഒരാള്ക്ക് 55 ലിറ്റര് കുടിവെള്ളം വീതം ലഭ്യമാക്കാന് വിഭാവനം ചെയ്യുന്ന കേന്ദ്ര ജല് ജീവന് മിഷന് പദ്ധതിക്കുള്ള ഫണ്ട് സംസ്ഥാനത്തു വലിയ തോതില് നഷ്ടമായേക്കും.
2019 ആഗസ്തില് തുടങ്ങിയ പദ്ധതി തീരാന് രണ്ടു മാസം മാത്രം ശേഷിക്കേ, സംസ്ഥാനത്തെ 791 പഞ്ചായത്തുകളില് ഇതുവരെ ലക്ഷ്യം കൈവരിച്ചത് 85 ഇടത്തു മാത്രം. രണ്ടു മാസം കൊണ്ട് ഇനി എത്ര സ്ഥലത്ത് പദ്ധതി പൂര്ത്തീകരിക്കുമെന്നു കണ്ടറിയണം. പദ്ധതി കാലാവധി ഒരു വര്ഷം കൂടി കേന്ദ്രം നീട്ടി നല്കുമെന്ന് അഭ്യൂഹമുണ്ടെങ്കിലും ഇതു സംബന്ധിച്ച് ഔദ്യോഗിക അറിയിപ്പൊന്നുമില്ല.
സംസ്ഥാനത്തു കുടിവെള്ളം പൈപ്പിലൂടെ ലഭ്യമാക്കേണ്ടത് 21 ലക്ഷം ഗ്രാമീണ കുടുംബങ്ങളിലാണ്. കേന്ദ്ര-സംസ്ഥാന സര്ക്കാര് വിഹിതങ്ങള്ക്കു പുറമേ 15 ശതമാനം പഞ്ചായത്തുവിഹിതമായും 10 ശതമാനം ഗുണഭോക്തൃവിഹിതമായും കണ്ടെത്തണം. എംഎല്എ ഫണ്ടില് നിന്നു തുക ലഭ്യമാക്കാനും അനുമതിയുണ്ട്.
രാജ്യത്ത് ഇതിനോടകം 4.17 കോടി ടാപ് കണക്ഷന് ഈ പദ്ധതി വഴി നല്കിക്കഴിഞ്ഞു. പക്ഷേ, കേരളം പദ്ധതിയോടു താത്പര്യം കാണിക്കുന്നേയില്ല. രാജ്യത്ത് ഏറ്റവും മോശം പ്രകടനമുള്ള സംസ്ഥാനമാണ് കേരളം. ഗുജറാത്ത് അടക്കം അഞ്ചു സംസ്ഥാനങ്ങളില് പദ്ധതി പൂര്ത്തിയായി. കേരളം ഒഴികെയുള്ള സംസ്ഥാനങ്ങളിലെല്ലാം എഴുപത്തിരണ്ട് ശതമാനം ലക്ഷ്യം കൈവരിച്ചു കഴിഞ്ഞു.
ജല സംഭരണി, ശുദ്ധീകരണശാല എന്നിവയ്ക്കായി ഭൂമി ഏറ്റെടുക്കല്, പൈപ്പിടാന് റോഡ് വെട്ടിപ്പൊളിക്കല്, വെട്ടിപ്പൊളിച്ച റോഡ് നന്നാക്കല് തുടങ്ങിയവയിലെ താമസമാണ് സംസ്ഥാനത്തു പദ്ധതി ഇഴയാന് കാരണം. കേന്ദ്ര പദ്ധതിയായതു കൊണ്ട് സംസ്ഥാന ജീവനക്കാരില് ഒരുപങ്ക് കാണിക്കുന്ന വിമുഖതയും മറ്റൊരു കാരണമാണ്. വെട്ടിപ്പൊളിക്കുന്ന റോഡ് പൂര്വ സ്ഥിതിയിലാക്കാന് ഫണ്ടില്ലെന്നു ചൂണ്ടിക്കാട്ടി തദ്ദേശ സ്വയംഭരണ വകുപ്പ് ഇതിനോട് അനുകൂല സമീപനത്തിലല്ല.
ഒരു വര്ഷം നീട്ടിയാലും സംസ്ഥാനത്തു പദ്ധതി പൂര്ത്തിയാക്കാനാകില്ലെന്നാണ് ഉദ്യോഗസ്ഥര് പറയുന്നത്. ജനങ്ങള്ക്കേറെ പ്രയോജനമുള്ള ഒരു കേന്ദ്ര പദ്ധതി കൂടി രാഷ്ട്രീയ വൈരത്തിന്റെ പേരില് പാഴാക്കിക്കളയുന്നു.
ജന്മഭൂമി ഓണ്ലൈന്