തിരുവനന്തപുരം: വര്‍ക്കലയില്‍ ഹരിഹരപുരം എല്‍പി സ്‌കൂളിന് സമീപം വീട്ടുകാര്‍ക്ക് ഭക്ഷണത്തില്‍ മയക്കുമരുന്ന് നല്‍കി മോഷണം.ഒരു വീട്ടിലെ മൂന്നുപേരെയാണ് മയക്കി കിടത്തി മോഷണം നടത്തിയത്. അബോധാവസ്ഥയിലായ വയോധിക ഉള്‍പ്പെടെ ഉള്ളവര്‍ ആശുപത്രിയിലാണ്. മോഷണം നടത്തിയ അഞ്ചംഗ സംഘത്തിലെ രണ്ട് പേരെ നാട്ടുകാര്‍ പിടികൂടി.
വീട്ടുജോലിക്ക് എത്തിയ നേപ്പാള്‍ സ്വദേശിനിയെ തെരയുന്നു. ഇന്നലെ രാത്രിയാണ് വീട്ടമ്മ ശ്രീദേവി, മരുമകള്‍ ദീപ, ഹോംനേഴ്‌സ് സിന്ധു എന്നിവരെ അബോധാവസ്ഥയില്‍ വീട്ടില്‍ കണ്ടെത്തിയത്.
നേപ്പാള്‍ സ്വദേശിനി യുവതി രണ്ടാഴ്ചയായി ഇവിടെ വീട്ടുജോലിക്ക് വരുന്നുണ്ടായിരുന്നു. ഇവരും ഇവരുടെ കൂട്ടാളികളായ നാല് പുരുഷന്‍മാരും കൂടിയാണ് മോഷണം നടത്തിയതെന്നാണ് പ്രാഥമിക വിവരം. മോഷ്ടാക്കള്‍ വീട്ടിലെ അലമാര കുത്തിത്തുറന്ന് പണവും സ്വര്‍ണവും മോഷ്ടിക്കുകയായിരുന്നു.
ശ്രീദേവിയമ്മയുടെ മകന്‍ ബംഗളൂരുവിലാണ് ജോലി ചെയ്യുന്നത്. ഇയാള്‍ അമ്മയെയും ഭാര്യയും ഫോണില്‍ മാറിമാറി വിളിച്ചിട്ട് കിട്ടയിരുന്നില്ല. തുടര്‍ന്ന് ബന്ധുവിനെ അറിയിക്കുകയും ഇയാള്‍ വീട്ടിലെത്തിയപ്പോള്‍ മോഷ്ടാക്കള്‍ വീട്ടില്‍ നിന്ന് ഇറങ്ങി ഓടുകയുമായിരുന്നു. ഇതിലൊരാളെ നാട്ടുകാര്‍ തന്നെ പിടികൂടി. വീട്ടിലൊളിച്ചിരുന്ന മറ്റൊരാളെ ഇന്ന് രാവിലെ പിടികൂടി പൊലീസില്‍ ഏല്‍പിച്ചു. ഇവര്‍ രണ്ട് പേരും നേപ്പാള്‍ സ്വദേശികളാണ്. മോഷണത്തിലെ മുഖ്യപ്രതി സ്ത്രീയുടെയും മറ്റ് രണ്ട് പേരുടെയും സിസിടിവി ദൃശ്യങ്ങള്‍ ലഭിച്ചു.
