ഏറണാകുളം: കേരളത്തിലെ മുന്‍ ധനമന്ത്രി തോമസ് ഐസക്കിന് വീണ്ടും ഇഡി നോട്ടീസ്. മസാല ബോണ്ട് കേസില്‍ ഈ മാസം 22ന് ഹാജരാകണമെന്നാണ് നിരര്‍ദേശം. കൊച്ചി ഓഫീസില്‍ രാവിലെ 11 മണിക്ക് എത്തണമെന്നും നോട്ടീസില്‍ വ്യക്തമാക്കുന്നു.
നേരത്തെ ഐസക്കിന് ഇഡി നോട്ടീസ് നല്‍കിയിരുന്നെങ്കിലും സിപിഎം സെക്രട്ടറിയേറ്റ് യോഗത്തില്‍ പങ്കെടുക്കേണ്ട സാഹചര്യം ചൂണ്ടിക്കാട്ടി അദ്ദേഹം ഹാജരായില്ല. കിഫ്ബിക്കായി ധനസമാഹരണത്തിനു വേണ്ടി മസാല ബോണ്ട് വാങ്ങിയതില്‍ ഫെമ ലംഘനം ഉണ്ടായെന്ന് ചൂണ്ടിക്കാട്ടിയാണ് ഇഡി അന്വേഷണം ആരംഭിച്ചത്.
ഇതേതുടര്‍ന്ന് നേരത്തെയും തോമസ് ഐസക്കിന് നോട്ടീസ് നല്‍കിയെങ്കിലും നിയമപോരാട്ടം ഹൈക്കോടതിയില്‍ എത്തിയിരുന്നു. പിന്നാലെ മുന്‍ നോട്ടീസ് പിന്‍വലിക്കുമെന്നും പുതിയ നോട്ടീസ് നല്‍കുമെന്നും ഇഡി ഹൈക്കോടതിയെ അറിയിച്ചിരുന്നു. ഇതനുസരിച്ച് ജനുവരി 12ന് നോട്ടീസ് നല്‍കിയിരുന്നെങ്കിലും തിരക്ക് മൂലം ഹാജരാകാന്‍ കഴിയില്ലെന്ന് അദ്ദേഹം അറിയിച്ചിരുന്നു.
