തൃശൂര്‍ : മകള്‍ ഭാഗ്യയുടെ വിവാഹച്ചടങ്ങില്‍ പങ്കെടുക്കാനെത്തിയ പ്രധാനമന്ത്രി നരേന്ദ്രമോദിക്ക് സ്വര്‍ണ്ണത്തളിക സമ്മാനിച്ച് സുരേഷ് ഗോപി. വിവാഹത്തിന് വന്‍ താരനിരയും പ്രമുഖരും എത്തുമെങ്കിലും പ്രധാനമന്ത്രി മകള്‍ക്ക് അനുഗ്രഹം നല്‍കാനെത്തുക എന്നത് അദ്ദേഹത്തിന്റെ വലിയ സ്വപ്‌നമായിരുന്നു. അതാണ് ഇന്ന് സാക്ഷാത്കരിച്ചിരിക്കുന്നത്.
സുരേഷ്‌ഗോപിയുടെ ആഗ്രഹം പോലെ തന്നെ മകളെയും വരനേയും കണ്ട് ആശംസ അറിയിക്കുക മാത്രമല്ല, വരണമാല്യം എടുത്തുനല്‍കി അനുഗ്രഹിക്കുകയും ചെയ്തു. തന്റെ ക്ഷണം സ്വീകരിച്ച് രാജ്യത്തെ പ്രധാന സേവകന്‍ എല്ലാ തിരക്കുകളും മാറ്റിവെച്ച് ഗുരുവായൂരിലെത്തുമ്പോള്‍ എന്താണ് സമ്മാനമായി നല്‍കുക, സ്വര്‍ണ്ണതളിക അല്ലാതെന്ത്.
സ്വര്‍ണ കരവിരുതില്‍ വിദഗ്ധനായ അനു അനന്തനെക്കൊണ്ടാണ് സുരേഷ് ഗോപി സ്വര്‍ണ തളിക നിര്‍മിച്ചത്. പ്രധാനമന്ത്രിക്കു സമ്മാനിക്കുന്നതിനു മുന്നോടിയായി എസ്പിജി ഉദ്യോഗസ്ഥര്‍ നേരത്തെ തന്നെ തളിക പരിശോധിച്ച് ഉറപ്പുവരുത്തിയശേഷമാണ് സുരേഷ്‌ഗോപി സമ്മാനം അദ്ദേഹത്തിന് കൈമാറിയത്.
മാവേലിക്കര സ്വദേശിയും ബിസിനസ്സുകാരനുമായ ശ്രേയസ് മോഹനാണ് സുരേഷ് ഗോപിയുടെ മകള്‍ ഭാഗ്യയെ വിവാഹം കഴിച്ചത്. ഭാഗ്യയെ കൂടാതെ ഗോകുല്‍ സുരേഷ്, മാധവ് സുരേഷ്, ഭാവ്‌നി സുരേഷ്, പരേതയായ ലക്ഷ്മി സുരേഷ് എന്നിവരാണ് മറ്റു മക്കള്‍.
