ന്യൂദല്ഹി: ഇന്ഡിഗോ വിമാനത്തിലെ യാത്രക്കാരന് ദല്ഹി വിമാനത്താവളത്തില് വെച്ച് പൈലറ്റിനെ മര്ദിച്ച സംഭവത്തില് ശക്തമായ നടപടികള്ക്ക് സാധ്യത. മര്ദനമേറ്റ ഇന്ഡിഗോ പൈലറ്റ് അനൂപ് കുമാര് നല്കിയ പരാതിയുടെ അടിസ്ഥാനത്തില് യാത്രക്കാരനായ സഹില് കതാരിയയെ ദല്ഹി പോലീസ് കസ്റ്റഡിയിലെടുത്തു. ഇയാളെ വിമാനത്തില് നിന്ന് കസ്റ്റഡിയിലെടുക്കുന്നതിന്റെ ദൃശ്യങ്ങള് പുറത്തുവന്നിട്ടുണ്ട്.
സംഭവത്തെക്കുറിച്ച് അന്വേഷിക്കാന് ഇന്ഡിഗോ ആഭ്യന്തര സമിതി രൂപീകരിച്ചു. യാത്രാവിലക്ക് ഏര്പ്പെടുത്തുന്നത് ഉള്പ്പെടെ കര്ശനമായ നടപടി യാത്രക്കാരനെതിരെ ഉണ്ടായേക്കുമെന്നാണ് റിപ്പോര്ട്ട്. മൂടല്മഞ്ഞ് കാരണം ദല്ഹിയില് നിന്ന് ഗോവയ്ക്കുള്ള ഇന്ഡിഗോ വിമാനം വൈകുമെന്ന അറിയിപ്പ് നല്കുന്നതിനിടെയാണ് യാത്രക്കാരന് കോ-പൈലറ്റിനെ മര്ദിച്ചത്.
വിമാനത്തില്വെച്ചുള്ള ഇത്തരം അതിക്രമങ്ങള് വെച്ചുപൊറുപ്പിക്കില്ലെന്നും നിലവിലെ നിയമങ്ങള് അനുസരിച്ചുള്ള ശക്തമായ നടപടികള് ഉണ്ടാകുമെന്നും കേന്ദ്ര വ്യോമയാന മന്ത്രി ജ്യോതിരാദിത്യസിന്ധ്യ പറഞ്ഞു.
