കൊല്ലം: കൊല്ലം, തിരുവനന്തപുരം ജില്ലകളിലാണ് സംസ്ഥാനത്ത് ഏറ്റവും കൂടുതല്‍ സ്ത്രീധന പീഡനക്കേസ് രജിസ്റ്റര്‍ ചെയ്യുന്നെന്ന് വനിതാ കമ്മീഷന്‍ അധ്യക്ഷ പി സതീദേവി. സമൂഹം പെണ്‍കുട്ടികളെ ഒരു ബാധ്യതയായാണ് കാണുന്നത്. പാരിതോഷികങ്ങള്‍ക്ക് പരിധി നിശ്ചയിക്കാനും ആഡംബര വിവാഹങ്ങള്‍ക്ക് നികുതി ഈടാക്കാനും സര്‍ക്കാരിനോട് ശുപാര്‍ശ ചെയ്യുമെന്നും സതീദേവി പറഞ്ഞു.
കൊല്ലം ജില്ലാതല പട്ടികവര്‍ഗ മേഖലാ ക്യാമ്പിനോടനുബന്ധിച്ച് കുളത്തൂപ്പുഴ ഗ്രാമപഞ്ചായത്ത് ഹാളില്‍ സംഘടിപ്പിച്ച സെമിനാര്‍ ഉദ്ഘാടനം ചെയ്തു സംസാരിക്കുകയായിരുന്നു സതീദേവി.സ്ത്രീധനം നിയമം കൊണ്ട് മാത്രം നിരോധിക്കാന്‍ കഴിയില്ലെന്ന് അദ്ദേഹം .
വിവാഹശേഷം ദമ്പതികള്‍ തമ്മില്‍ പ്രശ്‌നങ്ങളുണ്ടാകുമ്പോള്‍ വിട്ടുവീഴ്ച ചെയ്യാനാണ് ഉപദേശം നല്‍കുന്നത്. മര്‍ദനം ഉള്‍പ്പെടെ സഹിച്ച് ജീവിക്കണമെന്ന കാഴ്ചപ്പാട് പെണ്‍കുട്ടികളുടെ ജീവിതം താറുമാറാക്കും.ഇതിനോട് പൊരുത്തപ്പെടാനാകാതെ പെണ്‍കുട്ടികള്‍ ആത്മഹത്യയിലേക്ക് തിരിയുന്നത് ആശങ്കാജനകമാണെന്നും സതീദേവി പ്രതികരിച്ചു.
ജീവിതത്തെ കുറിച്ച് പെണ്‍കുട്ടികളുടെ കാഴ്ചപ്പാടില്‍ മാറ്റമുണ്ടായിട്ടുണ്ട്. എന്നാല്‍ കൂടുതല്‍ മാറ്റമുണ്ടാകേണ്ടത് മാതാപിതാക്കളുടെ ചിന്താഗതിയിലാണ്. പെണ്‍കുട്ടികള്‍ക്ക് അഭിപ്രായങ്ങള്‍ പറയുന്നതിന് അവസരം ഉണ്ടാവണം. സ്ത്രീകള്‍ക്ക് അവരില്‍ അന്തര്‍ലീനമായ കഴിവുകള്‍ സ്വയം തിരിച്ചറിയാനാകണം. സ്വന്തം ജീവിതം തിരിച്ചറിയാനും നിര്‍ണയിക്കാനും പെണ്‍കുട്ടികള്‍ക്ക് അവസരമുണ്ടാകണം. സ്വയം തീരുമാനങ്ങള്‍ എടുക്കാന്‍ പെണ്‍കുട്ടികളെ പ്രാപ്തരാക്കിയെങ്കിലേ സ്ത്രീശാക്തീകരണം പൂര്‍ണമാകുകയുള്ളൂ എന്നും വനിതാ കമ്മിഷന്‍ അധ്യക്ഷ പറഞ്ഞു.
