ചെന്നൈ: കൊറിയൻ ഗായക സംഘം ബിടിഎസിനെ കാണാനിറങ്ങിയ മൂന്ന് പെൺകുട്ടികളെ കണ്ടെത്തി. തമിഴ്നാട് കരൂർ സ്വദേശികളെയാണ് വെല്ലൂർ റെയിൽവേ സ്റ്റേഷനിൽ നിന്ന് കണ്ടെത്തിയത്. 13-വയസുകാരിയായ പെൺകുട്ടികളാണ് കൊറിയയിലേക്ക് പോകാൻ ശ്രമിച്ചത്.
ഈ കഴിഞ്ഞ വ്യാഴാഴ്ചയാണ് കേസിന് ആസ്പദമായ സംഭവം. ബിടിഎസ് സംഘത്തെ കാണാൻ പെൺകുട്ടികൾ നാടുവിടുകയായിരുന്നു. വിശാഖപട്ടണത്തെത്തി അവിടെ നിന്നും കപ്പൽ മാർഗ്ഗം കൊറിയയിലേക്ക് പോകാനായിരുന്നു പദ്ധതിയിട്ടത്. 14,000 രൂപയുമായാണ് ഇവർ കടന്നു കളയാൻ ശ്രമിച്ചത്.
കാട്പാടി സ്റ്റേഷനിൽ ചായ കുടിക്കാൻ ഇറങ്ങിയപ്പോൾ ട്രെയിൻ പോകുകയായിരുന്നു. പിന്നാലെ മൂവരും രാത്രി വരെ റെയിൽവേ സ്റ്റേഷനിൽ തങ്ങി. സംശയം തോന്നിയ റെയിൽവേ പോലീസ് ഇവരെ ചോദ്യം ചെയ്തതോടെയാണ് സംഭവം പുറത്തറിയുന്നത്.
