കൊല്ലം: സ്‌കൂള്‍ കലോത്സവത്തിലെ മത്സരക്രമത്തിന്റെ കാര്യത്തില്‍ നിര്‍ണായക തീരുമാനവുമായി ഇന്ന് ചേര്‍ന്ന ഉന്നത അവലോകന യോഗം. കലോത്സവ വേദികളില്‍ നിശ്ചിത സമയത്തിന് ഹാജരാകാത്തവരെ അയോഗ്യരാക്കും.
സംഘാടകസമിതി ഓഫീസില്‍ ചേര്‍ന്ന ജില്ലാ ടീം കോ ഓര്‍ഡിനേറ്റര്‍മാരുടെ അവലോകന യോഗത്തിന് ശേഷം വിദ്യാഭ്യാസമന്ത്രി വി ശിവന്‍കുട്ടിയാണ് ഇക്കാര്യം അറിയിച്ചത്. അപ്പീലുകള്‍ കൂടിയതും മത്സരാര്‍ത്ഥികള്‍ വേദിയിലെത്താന്‍ വൈകുന്നതും മല്‍സരങ്ങള്‍ വൈകാന്‍ കാരണമാകുന്നുവെന്ന് മന്ത്രി പറഞ്ഞു.
കുട്ടികള്‍ വേദിയില്‍ സമയത്തിനെത്തി എന്ന് ജില്ലാ കോ ഓര്‍ഡിനേറ്റര്‍മാര്‍ ഉറപ്പുവരുത്തണം. ഒന്നിലധികം മല്‍സരങ്ങളില്‍ പങ്കെടുക്കുന്ന കുട്ടികളുടെ അസൗകര്യവും ബുദ്ധിമുട്ടും ഒഴിവാക്കാന്‍ ക്ലസ്റ്ററില്‍ ക്രമീകരണം വരുത്തും. പ്രോഗ്രാം കമ്മിറ്റി കണ്‍വീനറും 14 ജില്ലാ കോ ഓര്‍ഡിനേറ്റര്‍മാരും തമ്മിലുള്ള ആശയവിനിമയം സുഗമമാക്കാന്‍ വാട്‌സ് ആപ്പ് ഗ്രൂപ്പ് ഉണ്ടാക്കി നിര്‍ദേശങ്ങള്‍ കൃത്യമായി അറിയിക്കും.
മത്സരഫലങ്ങള്‍ പ്രഖ്യാപിച്ചതിന് പിന്നാലെ വിജയികള്‍ക്കുളള മെമെന്റോ വിതരണം നടത്തും.സമാപന ദിവസം ഉച്ചക്ക് ഒരു മണിക്ക് മല്‍സരങ്ങള്‍ പൂര്‍ത്തിയാക്കണമെന്ന് മന്ത്രി ശിവന്‍കുട്ടി നിര്‍ദേശിച്ചു. വേദികളിലേക്കുള്ള യാത്രയ്‌ക്കായി സൗജന്യ ഓട്ടോ സേവനം പ്രയോജനപ്പെടുത്താം . യോഗത്തില്‍ 14 ജില്ലകളിലെയും കോ ഓര്‍ഡിനേറ്റര്‍മാര്‍ക്ക് പുറമെ ധനകാര്യ മന്ത്രി കെ എന്‍ ബാലഗോപാല്‍, എം എല്‍ എമാരായ എം മുകേഷ്, എം നൗഷാദ്, കോവൂര്‍ കുഞ്ഞുമോന്‍, എന്നിവര്‍ പങ്കെടുത്തു.
