ചെന്നൈ: നാര്കോട്ടിക്സ് കണ്ട്രോള് ബ്യൂറോയുടെ വിവിധ സോണുകളുടെ സംയുക്ത ഓപ്പറേഷനില് 75 കോടി വിലവരുന്ന 15.8 കിലോ ലഹരി വസ്തുക്കളുമായി അന്താരാഷ്ട്ര മയക്ക്മരുന്ന് ശൃംഖലയിലെ എട്ടുപേര് പിടിയില്.
ചെന്നൈ, ബെംഗളൂരു, ഇംഫാല് യൂണിറ്റുകള് സംയുക്തമായി നടത്തിയ ഓപ്പറേഷനിലൂടെയാണ് ലഹരിക്കടത്ത് സംഘം പിടിയിലായത്. ചെന്നൈയില് നിന്നാണ് മയക്കുമരുന്ന് പിടിച്ചെടുത്തത്.
മ്യാന്മറിലെ തമുവില് നിന്ന് മണിപ്പൂര്, ഗുവാഹത്തി, ചെന്നൈ വഴി ശ്രീലങ്കയിലേക്ക് കടല്മാര്ഗം കടത്താനുള്ള ശ്രമത്തിനിടെയാണ് നാര്കോട്ടിക്സ് കണ്ട്രോള് ബ്യൂറോ ലഹരിമരുന്ന് പിടിച്ചെടുത്തത്. 15.8 കിലോ മെത്താഫെറ്റാമൈന് പിടിച്ചെടുതായി നാര്കോട്ടിക്സ് കണ്ട്രോള് ബ്യൂറോ അറിയിച്ചു. ചായ പാക്കറ്റുകളില് ഒളിപ്പിച്ച നിലയിലാണ് മയക്കുമരുന്ന് ചെന്നൈയില് എത്തിച്ചത്.
കഴിഞ്ഞ മാസം ആദ്യം 4.8 കിലോ മെത്താഫെറ്റാമൈനുമായി ഒരു വനിത ഉള്പ്പെടെ നാല് പേര് പിടിയിലായിരുന്നു. ഇവരെ ചോദ്യം ചെയ്തതിലൂടെ കിട്ടിയ വിവരത്തിന്റെ അടിസ്ഥാനത്തിലാണ് സംയുക്ത ഓപ്പറേഷന് നടത്തിയത്.
