അയ്യപ്പ ഭക്തർ സഞ്ചരിച്ച ബസ് തോട്ടിലേക്ക് മറിഞ്ഞു; ചികിത്സയിലായിരുന്ന തീർത്ഥാടകൻ മരിച്ചു

കോട്ടയം: കോട്ടയത്ത് ബസ് മറിഞ്ഞ് ഗുരുതരമായി പരിക്കേറ്റ് ചികിത്സയിൽ കഴിഞ്ഞിരുന്ന ശബരിമല തീർത്ഥാടകൻ മരിച്ചു. തമിഴ്‌നാട് സ്വദേശി ആർ അറുമുഖനാണ് മരിച്ചത്. കോട്ടയം മെഡിക്കൽ കോളേജിൽ ചികിത്സയിലിരിക്കെയായിരുന്നു മരണം.

മേലുകാവിൽ അയ്യപ്പഭക്തർ സഞ്ചരിച്ച മിനി ബസ് തോട്ടിലേക്ക് മറിഞ്ഞത് ഇന്നലെ രാത്രി 11 മണിയോടെയായിരുന്നു. ഈരാറ്റുപേട്ട തൊടുപുഴ റോഡിലാണ് അപകടം. പോണ്ടിച്ചേരിയിൽ നിന്നും സന്നിധാനത്തേക്ക് പോകുകയായിരുന്ന അയ്യപ്പഭക്തർ സഞ്ചരിച്ച വാഹനമാണ് അപകടത്തിൽപ്പെട്ടത്. നിയന്ത്രണം വിട്ട ബസ് തോട്ടിലേക്ക് മറിയുകയായിരുന്നുവെന്നാണ് വിവരം.