കോഴിക്കോട്: വടകര ഓര്ക്കാട്ടേരിയില് ഷബ്നയുടെ മരണത്തില് ആത്മഹത്യാ പ്രേരണാക്കുറ്റവും സ്ത്രീധന വിരുദ്ധനിയമവും ഉള്പ്പെടെയുള്ള വകുപ്പുകള് ചേര്ത്ത് കേസെടുക്കാന് വനിതാ കമ്മീഷന് നിര്ദേശിച്ചു.ഷബ്നയുടെ ഭര്ത്താവിന്റെയും ഭര്ത്തൃമാതാവിന്റെയും സഹോദരിയുടെയും പേരില് കേസ് രജിസ്റ്റര് ചെയ്ത് അന്വേഷണം നടത്താനാണ് വടകര ഡിവൈഎസ്പിയ്ക്ക് വനിതാ കമ്മിഷന് അധ്യക്ഷ അഡ്വ. പി. സതീദേവി നിര്ദേശം നല്കിയത്.
വടകര ഓര്ക്കാട്ടേരിയിലെ ഭര്തൃ ഗൃഹത്തില് മരിച്ച ഷബ്നയുടെ ഉമ്മയെയും ബന്ധുക്കളെയും വീട്ടിലെത്തി സന്ദര്ശിച്ച ശേഷം പ്രതികരിക്കുകയായിരുന്നു വനിതാ കമ്മിഷന് അധ്യക്ഷ. ഭര്തൃഗൃഹത്തില് നിരന്തര പീഡനത്തിനിരയാക്കി മരണത്തിലേക്ക് ഷബ്നയെ തള്ളിവിട്ടുവെന്നതിനു വനിതാ കമ്മിഷന് അധ്യക്ഷയ്ക്കു മുന്പാകെ ബന്ധുക്കള് തെളിവുകള് നല്കി.ഷബ്നയുടെ ബന്ധുക്കളുടെ പരാതിയെ തുടര്ന്നാണ് വനിതാ കമ്മിഷന് അധ്യക്ഷ വീട് സന്ദര്ശിച്ചത്.
ഷബ്നയുടെ ആത്മഹത്യ നടന്ന് ദിവസങ്ങള്ക്ക് ശേഷമാണ് ഭര്ത്താവിന്റെ ബന്ധുക്കളെ പൊലീസ് പ്രതി ചേര്ത്തത്. ഷബ്നയുടെ ഭര്ത്താവിന്റെ മാതാപിതാക്കള്, സഹോദരി എന്നിവരെയാണ് പ്രതി ചേര്ത്തത്. ആത്മഹത്യ പ്രേരണ, ഗാര്ഹിക പീഡനം എന്നീ കുറ്റങ്ങളാണ് ചുമത്തിയിട്ടുളളത്. ഇവര് ഒളിവിലാണെന്നും ഉടന് പിടികൂടുമെന്നും പൊലീസ് വെളിപ്പെടുത്തി.
