പത്തനംതിട്ട: വീടുകൾ കേന്ദ്രീകരിച്ച് ബാംബു കർട്ടന്റെ മറവിൽ തട്ടിപ്പ് നടത്തിയ മൂന്നംഗ സംഘം അറസ്റ്റിൽ. 10,000 രൂപയിൽ താഴെ വില വരുന്ന കർട്ടൻ സ്ഥാപിച്ചതിന് ശേഷം 90,000 രൂപ തട്ടിയെടുക്ക സംഭവത്തിലാണ് അറസ്റ്റ്. പ്രായമായവർ ഒറ്റയ്ക്ക് താമസിക്കുന്ന വീടുകൾ കേന്ദ്രീകരിച്ച് തട്ടിപ്പ് നടത്തുന്നതായിരുന്നു സംഘത്തിന്റെ രീതി. സംഭവത്തിൽ കരുനാഗപ്പള്ളി തഴവ സ്വദേശി ഹാഷിം, ശൂരനാട് സ്വദേശികളായ അൻസിൽ, റിയാസ് എന്നിവരാണ് അറസ്റ്റിലായത്.
കഴിഞ്ഞ ദിവസം ആറന്മുളയിലെ വീട്ടിലെത്തിയ സംഘം സ്ക്വയർ ഫീറ്റിന് 200 രൂപ നിരക്കിൽ ബാംബു കർട്ടൻ ഇട്ട് നൽകാമെന്ന് പറഞ്ഞു. കർട്ടനിട്ടതിന് പിന്നാലെ 45,000 രൂപ ആവശ്യപ്പെട്ടു. വീട്ടമ്മയുടെ പക്കലുണ്ടായിരുന്ന 14,000 രൂപ അവർ പണമായി നൽകി. ബാക്കി തുകയ്ക്ക് ബ്ലാക്ക് ചെക്കുകൾ നൽകണമെന്ന് പ്രതികൾ ആവശ്യപ്പെട്ടു.
ചെക്കുകൾ അന്ന് തചന്നെ ബാങ്കിൽ ഹാജരാക്കി 85,000 രൂപ സംഘം പിൻവലിച്ചു. തുടർന്ന് വീട്ടുകാർ നൽകിയ പരാതിയിലാണ് സംഘം പിടിയിലായത്.
