ബെംഗളൂരു: ഭാരതത്തിലെ ആഭ്യന്തര ഏകദിന ക്രിക്കറ്റ് ടൂര്ണമെന്റ് വിജയ് ഹസാരെ ട്രോഫി ക്രിക്കറ്റ് ഗ്രൂപ്പ് ഘട്ട പോരാട്ടത്തില് കേരളം ഇന്ന് സിക്കിമിനെതിരെ. ടൂര്ണമെന്റില് കളിച്ച നാല് കളികളില് മൂന്നും ജയിച്ച് പട്ടികയില് രണ്ടാം സ്ഥാനത്തുള്ള കേരളം കഴിഞ്ഞ മത്സരത്തില് ത്രിപുരയെ തോല്പ്പിച്ചിരുന്നു.
ഇന്ന് ബെംഗളൂരുവിലാണ് കേരളവും സിക്കിമും തമ്മിലുള്ള കളി. ഇതുവരെ കളിച്ച നാല് മത്സരങ്ങളും ഹൈദരാബാദിലെ ആളൂരിലായിരുന്നു. ഇതുവരെ നടന്ന മത്സരത്തില് കരുത്തരായ മുംബൈയോട് മാത്രമാണ് കേരളം പരാജയമറിഞ്ഞിട്ടുള്ളത്. ത്രിപുരയെ കൂടാതെ നിലവിലെ ചാമ്പ്യന്മാരായ സൗരാഷ്ട്രയെയും ഒഡീഷയെയും കീഴടക്കി 12 പോയിന്റാണ് കേരളം സ്വന്തമാക്കിയിട്ടുള്ളത്.
ഇന്ന് കേരളത്തിനെതിരെ ഇറങ്ങുന്ന സിക്കിം ഗ്രൂപ്പ് എയില് ഇതുവരെ ഒരു ജയം പോലും നേടിയിട്ടില്ല. കളിച്ച നാല് മത്സരങ്ങളിലും പരാജയപ്പെട്ട് പട്ടികയില് ഏറ്റവും താഴെയാണ്. വിവിധ ഗ്രൂപ്പുകളിലായി കേരളത്തിന്റേതടക്കം വിജയ് ഹസാരെയില് 17 മത്സരങ്ങളാണ് ഇന്ന് നടക്കുക.
