കൊച്ചി: ഐഎസ്എല്ലില്‍ തുടര്‍ച്ചയായ നാലാം വിജയവും പോയിന്റ് പട്ടികയിലെ ഒന്നാം സ്ഥാനം തിരിച്ചുപിടിക്കാനും ലക്ഷ്യമിട്ട് കേരള ബ്ലാസ്റ്റേഴ്സ് ഇന്ന് വീണ്ടും പോരാട്ടത്തിനിറങ്ങുന്നു. കലൂര്‍ ജവഹര്‍ലാല്‍ നെഹ്‌റു സ്റ്റേഡിയത്തില്‍ നടക്കുന്ന മത്സരത്തില്‍ എതിരാളികള്‍ ചെന്നൈയിന് എഫ്സി. രാത്രി എട്ടിനാണ് സതേണ്‍ ഡെര്‍ബി കിക്കോഫ്. ലീഗിലെ ഇടവേളയ്‌ക്കുശേഷം കഴിഞ്ഞ കളിയില്‍ മുന്‍ ചാമ്പ്യന്മാരായ ഹൈദരാബാദ് എഫ്സിയെ കീഴടക്കിയതിന്റെ ആത്മവിശ്വാസത്തിലാണ് ബ്ലാസ്റ്റേഴ്സ് സീസണിലെ എട്ടാം മത്സരത്തിനിറങ്ങുന്നത്. സ്വന്തം ആരാധകര്‍ക്ക് മുന്നില്‍ തോല്‍വിയറിയാതെയാണ് സീസണില്‍ ബ്ലാസ്റ്റേഴ്സിന്റെ കുതിപ്പ്. ഒന്നാമതുള്ള എഫ്സി ഗോവയ്‌ക്കും ബ്ലാസ്റ്റേഴ്സിനും 16 പോയിന്റ് വീതമാണുള്ളതെങ്കിലും ഗോള്‍ ശരാശരിയില്‍ കേരള ബ്ലാസ്റ്റേഴ്സ് രണ്ടാം സ്ഥാനത്താണ്. ഇന്ന് വിജയിച്ചാല്‍ 19 പോയിന്റുമായി കൊമ്പന്മാര്‍ ഒന്നാം സ്ഥാനം തിരിച്ചുപിടിക്കും. എന്നാല്‍ ഗോവ ബ്ലാസ്റ്റേഴ്സിനെ അപേക്ഷിച്ച് ഒരു മത്സരം കുറവാണ് കളിച്ചത്. ഇന്ന് സമനിലയാ നേടാനായാല്‍ പോലും ബ്ലാസ്റ്റേഴ്‌സിന് വീണ്ടും ഗോവയെ മറികടന്ന് ടേബിള്‍ തലപ്പത്തെത്താം.
അതേസമയം മൂന്നാം വിജയം ലക്ഷ്യമിട്ടാണ് ചെന്നൈയിന് എഫ്സി ഇന്ന് കൊച്ചിയില്‍ കളിക്കാനിറങ്ങുന്നത്. സീസണില്‍ ഇതുവരെ മികച്ച ഫോമിലേക്കുയരാന്‍ കഴിയാത്തത് അവര്‍ക്ക് തിരിച്ചടിയാണ്. കളിച്ച 7 കളികളില്‍ നാലും തോറ്റ അവര്‍ ജയിച്ചത് രണ്ടില്‍ മാത്രം. ഒരെണ്ണം സമനിലയിലും പിരിഞ്ഞു. നിലവില്‍ 7 കളികളില്‍ നിന്ന് 7 പോയിന്റുമായി ഏഴാം സ്ഥാനത്താണ് ചെന്നൈയിന് എഫ്സി.
വിലക്കിന് ശേഷം കളത്തിലെത്തിയ മിലോസ് ഡ്രിന്‍സിച്ചിന്റെ ഗോളിലാണ് കഴിഞ്ഞ മത്സരത്തില്‍ ബ്ലാസ്റ്റേഴ്സ് വിജയം സ്വന്തമാക്കിയത്. പ്രതിരോധ താരമാണെങ്കിലും ഈ മോണ്ടിനെഗ്രോക്കാരന്റെ സേവനം കളത്തില്‍ എല്ലായിടത്തുമെത്തി. പന്തടക്കത്തില്‍ പിന്നിലായ ബ്ലാസ്റ്റേഴ്സ് നിരവധി ഗോള്‍ ശ്രമങ്ങള്‍ നടത്തിയെങ്കിലും വല ലക്ഷ്യമാക്കി പന്തെത്തിയത് രണ്ടു തവണ മാത്രമായിരുന്നു. ആക്രമണങ്ങള്‍ക്ക് മൂര്‍ച്ചയില്ലെന്ന പോരായ്‌മയുണ്ട്. അതേസമയ പ്രതിരോധ നിര മികച്ച കളിയാണ് പുറത്തെടുത്തത്.
പന്തടക്കത്തില്‍ ആധിപത്യം പുലര്‍ത്തിയ ഹൈദരാബാദിനെ തളച്ചത് പ്രതിരോധമായിരുന്നു. ഡാനിഷ് ഫാറൂഖ് ഉള്‍പ്പെടുന്ന മധ്യനിരയും മികച്ച പ്രകടനമാണ് നടത്തിയത്. പോരായ്‌മകള്‍ നികത്തി ചെന്നൈയിനെതിരെ മികച്ച വിജയമാണ് ബ്ലാസ്റ്റേഴ്സ് ലക്ഷ്യമിടുന്നത്. അഡ്രിയാന്‍ ലൂണ, ക്വാമി പെപ്ര, ഡയ്‌സുകെ, രാഹുല്‍ തുടങ്ങിയ താരങ്ങള്‍ ഹൈദരാബാദിനെതിരെ മികച്ച പ്രകടനം നടത്തിയിരുന്നു. എന്നാല്‍ ക്വാമി പെപ്ര ഗോളടിക്കുന്നതില്‍ മികവു കാണിക്കുന്നില്ല എന്നതാണ് ടീമിന് ദോഷകരമായിട്ടുള്ളത്. ഗോള്‍വലക്ക് കീഴില്‍ സച്ചിന്‍ സുരേഷിന്റെ മികവും വിജയത്തില്‍ നിര്‍ണായകമായി. ടീമില്‍ ഇവാന്‍ വുകോമനോവിച്ച് കാര്യമായ മാറ്റങ്ങള്‍ വരുത്താന്‍ സാധ്യതയില്ല.
സീസണില്‍ ചെന്നൈയിന്റെ നാലാമത്തെ എവേ മത്സരമാണ് കൊച്ചിയില്‍. അവസാന മത്സരത്തില്‍ ഈസ്റ്റ് ബംഗാളിനോട് സമനില വഴങ്ങി. കൊച്ചിയിലെ ആരാധകര്‍ക്ക് മുന്നിലെ മത്സരം വെല്ലുവിളി നിറഞ്ഞതാണെങ്കിലും മികച്ച പ്രകടനം നടത്തി വിജയമാണ് ടീം ലക്ഷ്യമിടുന്നതെന്ന് ചെന്നൈയിന് പരിശീലകന്‍ ഓവന്‍ കോയില്‍ പറഞ്ഞു. മുന്‍ ബ്ലാസ്റ്റേഴ്സ് താരം വിന്‍സി ബരേറ്റയുള്‍പ്പെടെ ചെന്നൈ നിരയിലുണ്ട്. റഹീം അലി ടീമില്‍ തിരിച്ചെത്തുമെന്ന് സൂചന നല്‍കിയ കോച്ച്, ജോര്‍ദാന്‍ മുറെയുടെ പരിക്കിന് കാര്യമായ മാറ്റമുണ്ടെന്നും അറിയിച്ചു. ഐഎസ്എലില്‍ ഇതുവരെ കളിച്ച 20 മത്സരങ്ങളില്‍ ആറ് മത്സരങ്ങള്‍ വീതം ഇരുടീമുകളും ജയിച്ചു. ബാ്ക്കി കളികള്‍ സമനിലിയില്‍ പിരിഞ്ഞു.
ജന്മഭൂമി ഓണ്‍ലൈന്‍