ന്യൂദല്‍ഹി : വാഹനാപകടത്തില്‍ പരിക്കേറ്റവര്‍ക്ക് രക്ഷകനായി ഇന്ത്യന്‍ ക്രിക്കറ്റ് താരം മുഹമ്മദ് ഷമി. ഉത്തരാഖണ്ഡിലെ നൈനിറ്റാളില്‍വച്ചാണ് സംഭവം. ഇതിന്റെ വിഡിയോ ദൃശ്യങ്ങള്‍ താരം തന്നെ സമൂഹമാധ്യമത്തില്‍ പങ്കുവച്ചിട്ടുമുണ്ട്. വാഹനാപകടത്തില്‍പെട്ടയാള്‍ക്ക് ദൈവം നല്‍കിയ രണ്ടാം ജന്മമാണെന്നാണ് ഷമി സമൂഹ മാധ്യമത്തില്‍ കുറിച്ചത്.
”നൈനിറ്റാളിന് സമീപത്തെ ഹില്‍ റോഡില്‍നിന്ന് അദ്ദേഹത്തിന്റെ കാര്‍ താഴേക്കു പതിച്ചു. എന്റെ കാറിനു തൊട്ടുമുന്‍പിലായിരുന്നു സംഭവം. ഞങ്ങള്‍ അദ്ദേഹത്തെ സുരക്ഷിതമായി പുറത്തെത്തിച്ചു.’ എന്നായിരുന്നു ഷമി പറഞ്ഞത്. ഏകദിന ലോകകപ്പിലെ മികച്ച പ്രകടനത്തിനു ശേഷം വിശ്രമത്തിലാണ് ഷമി. 2023 ലോകകപ്പില്‍ ഏഴു മത്സരങ്ങളില്‍നിന്ന് 24 വിക്കറ്റുകളാണു താരം നേടിയത്. ലോകകപ്പില്‍ ബംഗ്ലാദേശിനെതിരായ മത്സരത്തില്‍ ഹാര്‍ദിക് പാണ്ഡ്യയ്‌ക്കു പരിക്കേറ്റതോടെയാണ് ഷമിയെ ബിസിസിഐ പ്ലേയിങ് ഇലവനിലേക്കു പരിഗണിച്ചത്.
