തിരുവനന്തപുരം : മധ്യ പടിഞ്ഞാറന് ബംഗാള് ഉള്ക്കടലില് തീവ്ര ന്യൂനമര്ദ്ദം രൂപപ്പെട്ടതിനെ തുടര്ന്ന് കേരളത്തില് അടുത്ത അഞ്ച് ദിവസത്തേയ്ക്ക് മഴയ്ക്ക് സാധ്യതയെന്ന് മുന്നറിയിപ്പ്. ഒറ്റപ്പെട്ട സ്ഥലങ്ങളില് ഇടിമിന്നലോടു കൂടിയ ശക്തമായ മഴയായിരിക്കും അനുഭവപ്പെടുക. തുടക്കത്തില് വടക്ക് പടിഞ്ഞാറു ദിശയിലും പിന്നീട് വടക്ക് പടിഞ്ഞാറു ദിശയിലും സഞ്ചരിച്ച് ന്യൂനമര്ദ്ദം നാളെ രാവിലെയോടെ ആന്ധ്രാപ്രദേശ് തീരത്തിന് സമീപം അതി തീവ്ര ന്യൂനമര്ദ്ദമായി ശക്തി പ്രാപിക്കും.
നവംബര് 17 ഓടെ ന്യൂനമര്ദ്ദം ഒഡിഷ തീരത്തിനു സമീപവും, നവംബര് 18 ഓടെ വടക്കന് ഒഡീഷ – പശ്ചിമ ബംഗാളിന് സമീപത്തു കൂടിയും സഞ്ചരിക്കാന് സാധ്യതയുണ്ട്. വടക്കന് ശ്രീലങ്കയ്ക്ക് മുകളില് മറ്റൊരു ചക്രവാതചുഴി സ്ഥിതി ചെയ്യുന്നുണ്ട്. കേരള തീരത്ത് ബുധനാഴ്ച രാത്രി 11.30 വരെ 1.0 മുതല് 1.5 മീറ്റര് വരെ ഉയര്ന്ന തിരമാലയ്ക്കും കടലാക്രമണത്തിനും സാധ്യതയുണ്ട്. തെക്കന് തമിഴ്നാട് തീരത്തും ഇന്ന് രാത്രി 11.30 വരെ 1.0 മുതല് 1.4 മീറ്റര് വരെ ഉയര്ന്ന തിരമാലയ്ക്കും കടലാക്രമണത്തിനും സാധ്യതയുണ്ടെന്നും കേന്ദ്ര മുന്നറിയിപ്പില് പറയുന്നുണ്ട്.
