ജയ്‌പൂര്‍(രാജസ്ഥാന്‍): മഹാറാണി വസുന്ധര രാജെ സിന്ധ്യ, ജയ്‌പൂര്‍ രാജകുമാരി ദിയാകുമാരി, ബിക്കാനീറിന്റെ ബായ് സാ സിദ്ധികുമാരി…. പോരാട്ട വീര്യം ത്രസിക്കുന്ന രാജസ്ഥാനിന്റെ മണ്ണില്‍ തെരഞ്ഞെടുപ്പ് ബിജെപിക്ക് രാജകീയമാകുന്നത് ഇങ്ങനെയാണ്.
ബിക്കാനീര്‍ ഈസ്റ്റ് മണ്ഡലത്തില്‍ നിന്നാണ് ബിജെപി സ്ഥാനാര്‍ത്ഥിയായി സിദ്ധികുമാരി മത്സരിക്കുന്നത്. ബിക്കാനീറിന്റെ രാജകുമാരി… ജനങ്ങള്‍ക്ക് ബായ് സാ… പ്രിയപ്പെട്ട മകള്‍… കൊട്ടാരം വിട്ട് ഇരുപത്തഞ്ചാം വയസുമുതല്‍ സിദ്ധികുമാരി ജനങ്ങള്‍ക്കിടയിലുണ്ട്. സേവനവും ജനക്ഷേമപ്രവര്‍ത്തനങ്ങളുമായി എവിടെയും നിറഞ്ഞ്… ബിക്കാനീറിലെ അമ്മമാര്‍ അറിഞ്ഞ് വിളിച്ച പേരാണ് ബായ് സാ എന്നത്.
ബിക്കാനീര്‍ രാജാവ് റാണാ നരേന്ദ്രസിങ് ബഹാദൂറിന്റെ മകള്‍, മഹാരാജാ ഡോ. കര്‍ണിസിങ് ബഹാദൂറിന്റെ കൊച്ചുമകള്‍… രാജകുമാരി തങ്ങള്‍ക്കിടയിലേക്ക് വന്നപ്പോള്‍ ജനങ്ങള്‍ക്ക് ആദ്യം അമ്പരപ്പായിരുന്നു. പഠനത്തിന് ശേഷം തന്റെ വഴി ജനസേവനമാണെന്ന് തിരിച്ചറിഞ്ഞാണ് സിദ്ധികുമാരി ഈ ദൗത്യം ഏറ്റെടുത്തത്. ബിക്കാനീറിലെ ലാല്‍ഗഡ് ചരിത്ര മ്യൂസിയം സ്വന്തം പ്രയത്‌നം കൊണ്ട് കെട്ടിപ്പടുക്കുമ്പോള്‍ സിദ്ധികുമാരിക്ക് പ്രായം വെറും ഇരുപത്തഞ്ചാണ്. കാല്‍നൂറ്റാണ്ടായി ബിക്കാനീറിന്റെ ഹൃദയത്തുടിപ്പായി സിദ്ധികുമാരിയുണ്ട്. ഇക്കുറി വീണ്ടും മത്സരരംഗത്ത്… ഫലം ജനങ്ങള്‍ വാരിയെറിയുന്ന പൂക്കളിലുണ്ട്.
