കോഴിക്കോട്: മാതാ അമൃതാനന്ദമയി ദേവിയുടെ എഴുപതാം ജന്മദിനത്തോടനുബന്ധിച്ചും കൊച്ചി അമൃത ആശുപത്രിയുടെ 25-ാം വാര്ഷികത്തോടനുബന്ധിച്ചും മലബാര് മേഖലയിലെ അഞ്ച് ജില്ലകളിലുള്ള ഹൃദയവൈകല്യങ്ങളുള്ള കുട്ടികള്ക്കായി കോഴിക്കോട് സൗജന്യ മെഗാ മെഡിക്കല് ക്യാമ്പ് സംഘടിപ്പിക്കുന്നു.
കോഴിക്കോട്, കാസര്കോട്, കണ്ണൂര്, വയനാട്, മലപ്പുറം ജില്ലകളിലെ കുട്ടികള്ക്കായാണ് 12ന് കോഴിക്കോട് വെള്ളിമാട്കുന്ന് മാതാ അമൃതാനന്ദമയി മഠത്തിനോട് ചേര്ന്നുള്ള അമൃതകൃപ സ്പെഷ്യാലിറ്റി ക്ലിനിക്കില് വച്ച് മെഡിക്കല് ക്യാമ്പ് നടത്തുന്നത്. ക്യാമ്പ് കോഴിക്കോട് മെഡിക്കല് കോളജ് സൂപ്രണ്ട് ഡോ. എം.പി. ശ്രീജയന് ഉദ്ഘാടനം ചെയ്യും. രാവിലെ 8.30 മുതല് വൈകിട്ട് നാലു വരെ നടക്കുന്ന ക്യാമ്പിന് കൊച്ചി അമൃത ആശുപത്രിയിലെ പീഡിയാട്രിക് കാര്ഡിയോളജി വിഭാഗത്തിലെ പ്രൊഫസര്മാരായ ഡോ. പി.കെ. ബ്രിജേഷ്, ഡോ. ബാലു വൈദ്യനാഥന് എന്നിവര് നേതൃത്വം നല്കും.
അമൃതകൃപ സ്പെഷ്യാലിറ്റി ക്ലിനിക്കിന്റെ ഉദ്ഘാടനം 12ന് രാവിലെ 8.30ന് കൊച്ചി അമൃത സ്കൂള് ഓഫ് മെഡിസിന് പ്രിന്സിപ്പല് ഡോ. കെ.പി. ഗിരീഷ്കുമാര് നിര്വഹിക്കും. ക്യാമ്പിലെത്തുന്ന കുട്ടികളില് ഹൃദയശസ്ത്രക്രിയ ആവശ്യമായി വരുന്നവരില് സാമ്പത്തികമായി പിന്നാക്കം നില്ക്കുന്ന എല്ലാവര്ക്കും കൊച്ചി അമൃത ആശുപത്രിയില് ശസ്ത്രക്രിയ സൗജന്യമായി നടത്തുമെന്ന് അധികൃതര് വാര്ത്താ സമ്മേളനത്തില് അറിയിച്ചു.
ക്യാമ്പില് പങ്കെടുക്കുന്നതിനായി 9744894949, 8921508515 എന്നീ നമ്പറുകളില് വിളിച്ച് പേര് രജിസ്റ്റര് ചെയ്യേണ്ടതാണ്. കോഴിക്കോട് മാതാ അമൃതാന്ദമയി മഠം മഠാധിപതി സ്വാമി വിവേകാമൃതാനന്ദപുരി, അമൃത ആശുപത്രിയിലെ പീ
ഡിയാട്രിക് കാര്ഡിയോളജി വിഭാഗം പ്രൊഫസര് ഡോ. പി.കെ. ബ്രിജേഷ്, ജനറല് സര്ജറി വിഭാഗം പ്രൊഫസര് ഡോ. സി. ശ്രീകുമാര് എന്നിവര് വാര്ത്താസമ്മേളനത്തില് പങ്കെടുത്തു.
