മുണ്ടക്കയം: കോടാലി കൊണ്ട് തലയ്‌ക്ക് അടിച്ച് മകനെ കൊലപ്പെടുത്തിയ കേസില്‍ അമ്മയെ പോലീസ് അറസ്റ്റ് ചെയ്തു. കോരുത്തോട് കുഴിമാവ് ടോപ്പ് തോപ്പില്‍ വീട്ടില്‍ സാവിത്രി (73)യാണ് മുണ്ടക്കയം പോലീസിന്റെ പിടിയിലായത്.
സാവിത്രിയുടെ മകന്‍ അനുദേവന്‍(45) കോട്ടയം മെഡിക്കല്‍ കോളജ് ആശുപത്രിയില്‍ ചികിത്സയിലിരിക്കെ കഴിഞ്ഞ ദിവസമാണ് മരിച്ചത്. വീടിന് സമീപം കൈയാലയില്‍ നിന്നും വീണ് പരിക്കേറ്റതാണെന്നു പറഞ്ഞായിരുന്നു ഇയാളെ ആശുപത്രിയില്‍ പ്രവേശിപ്പിച്ചിരുന്നത്. ഇയാളുടെ മരണകാരണം തലയ്‌ക്കുണ്ടായ ക്ഷതം മൂലമാണെന്ന് ഡോക്ടര്‍മാര്‍ പറഞ്ഞതിനെ തുടര്‍ന്ന് മുണ്ടക്കയം പോലീസ് നടത്തിയ അന്വേഷണത്തിലാണ് അമ്മയെ അറസ്റ്റു ചെയ്തത്.
സ്ഥിരമായി മദ്യപിച്ചെത്തി അമ്മയുമായി വഴക്കുണ്ടാക്കുകയും ദേഹോപദ്രവം ഏല്‍പ്പിക്കുകയും ചെയ്യുന്നതിലുള്ള വിരോധം മൂലം വീടിന് സമീപം ഇരുന്ന കോടാലി ഉപയോഗിച്ച് തലയ്‌ക്ക് അടിക്കുകയായിരുന്നു. മുണ്ടക്കയം സ്റ്റേഷന്‍ എസ്എച്ച്ഒ ഷൈന്‍ കുമാര്‍ എ.യുടെ നേതൃത്വത്തിലാണ് അറസ്റ്റ്. ഇവരെ കോടതിയില്‍ ഹാജരാക്കി.
