ടെല്അവീവ്: ഇസ്രായേലുമായുള്ള പോരാട്ടത്തിനിടെ ഹമാസ് ഭീകരര് ബന്ദികളാക്കിയ രണ്ട് യുഎസ് പൗരന്മാരെ വിട്ടയച്ചു. ജൂഡിത്ത് തായ് റാണന് (59), മകള് നതാലി (17) എന്നിവരെയാണ് ഹമാസ് ഭീകരര് റെഡ് ക്രോസിന് കൈമാറിയത്. വെള്ളിയാഴ്ച ഗാസ അതിര്ത്തിയില് വച്ച് റെഡ് ക്രോസ് ഇസ്രായേല് സേനയ്ക്ക് ഇരുവരെയും കൈമാറി.
ഹമാസിന്റെ സായുധ വിഭാഗമായ ഇസ് എല്-ദീന് അല്-ഖസ്സാം ബ്രിഗേഡിന്റെ വക്താവ് അബു ഉബൈദാണ് ഇരുവരെയും മോചിപ്പിക്കുന്നതായി പ്രഖ്യാപിച്ചത്. മനുഷ്യത്വപരമായ കാരണങ്ങളാലാണ് ഇവരുടെ മോചനമെന്ന് ഹമാസ് പ്രസ്താവനയിലൂടെ അറിയിച്ചു. ഹമാസ്-ഇസ്രയേല് അക്രമം പൊട്ടിപ്പുറപ്പെട്ടതിന് ശേഷം ഹമാസ് മോചിപ്പിക്കുന്ന ആദ്യത്തെ തടവുകാരാണ് ഇവര്.
ഇവരുടെ കുടുംബവുമായി അമേരിക്കന് പ്രസിഡന്റ് ജോ ബൈഡന് ഫോണില് സംസാരിച്ചു. സുഖം പ്രാപിക്കുന്നതുവരെ സര്ക്കാര് പൂര്ണമായും പിന്തുണക്കുമെന്ന് അവരെ അറിയിച്ചുവെന്നും ബൈഡന് എക്സില് കുറിച്ചു. അമ്മയും മകളും പ്രസിഡന്റ് ബൈഡനുമായി ഫോണില് സംസാരിക്കുന്ന ചിത്രം ജറുസലേമിലെ യുഎസ് എംബസി പുറത്തുവിട്ടിരുന്നു. ഒക്ടോ. ഏഴിനാണ് കിബുത്സ് നഹാല് ഓസില് വച്ച് ഇവരെ ഹമാസ് ബന്ദികളാക്കിയത്. മുത്തശ്ശിയുടെ 85-ാം പിറന്നാള് ആഘോഷവും ഇളയ മകളുടെ ഹൈസ്കൂള് പഠനവുമായും ബന്ധപ്പെട്ടാണ് ഇവര് ഇസ്രായേലിലെത്തിയതെന്നാണ് വിവരം.
മുഴുവന് ബന്ദികളെയും മോചിപ്പിക്കാനുള്ള ശ്രമം ഇസ്രായേല് തുടരുകയാണെന്ന് ഐഡിഎഫ് വക്താവ് ഡാനിയല് ഹഗാരി പറഞ്ഞു. യുദ്ധത്തിന്റെ അടുത്ത ഘട്ടത്തിനായി തയാറെടുക്കുകയാണ്. പോരാട്ടം ആഴ്ചകള് നീണ്ടേക്കാമെന്നും അദ്ദേഹം കൂട്ടിച്ചേര്ത്തു.
