ന്യൂദല്‍ഹി: തിലക് നഗര്‍ പ്രദേശത്തെ സ്‌കൂളിന്റെ മതിലിന് സമീപം സ്ത്രീയുടെ മൃതദേഹം കണ്ടെത്തി.സ്വിറ്റ്‌സര്‍ലണ്ടിലെ സൂറിച്ചില്‍ നിന്നുള്ള സ്ത്രീയാണ് കൊല്ലപ്പെട്ടത്.
സംശയത്തിന്റെ അടിസ്ഥാനത്തില്‍ ഗുര്‍പ്രീത് എന്നയാളെ ദല്‍ഹി പൊലീസ് പിടികൂടി.ഇയാളെ ചോദ്യം ചെയ്തുവരികയാണ്.
വെള്ളിയാഴ്ച രാവിലെ ദല്‍ഹി മുനിസിപ്പല്‍ കോര്‍പ്പറേഷന്റെ സ്‌കൂളിന് സമീപമാണ് യുവതിയുടെ മൃതദേഹം കണ്ടെത്തിയത്. അതിന്റെ മുകള്‍ഭാഗം മാലിന്യം വലിച്ചെറിയുന്ന പ്ലാസ്റ്റിക് ബാഗ് കൊണ്ട് പൊതിഞ്ഞ നിലയിലായിരുന്നുവെന്ന് പൊലീസ് പറഞ്ഞു.കാലുകള്‍ ചങ്ങല കൊണ്ട് ബന്ധിച്ചിരുന്നു.
പ്രതി ഒരു പഴയ കാര്‍ വാങ്ങി യുവതിയെ കൊലപ്പെടുത്തിയ ശേഷം മൃതദേഹം അതില്‍ ഉപേക്ഷിക്കുകയായിരുന്നുവെന്ന് പൊലീസ് പറഞ്ഞു. കാറില്‍ നിന്ന് ദുര്‍ഗന്ധം വമിക്കാന്‍ തുടങ്ങിയതിനെ തുടര്‍ന്ന് ഇയാള്‍ മൃതദേഹം റോഡരികില്‍ ഉപേക്ഷിച്ചു. പ്രതിയില്‍ നിന്ന് രണ്ട് കോടിയോളം രൂപ കണ്ടെടുത്തതായാണ് റിപ്പോര്‍ട്ട്.
ഇന്ത്യന്‍ ശിക്ഷാ നിയമത്തിലെ (ഐപിസി) 302, 201 വകുപ്പുകള്‍ പ്രകാരമാണ് കൊലപാതകത്തിന് കേസെടുത്തിരിക്കുന്നത്.
