കല്പ്പറ്റ: ബസില് നാലു വയസുകാരന് ഛര്ദിച്ചതിനെത്തുടര്ന്ന് അച്ഛനെ തെറിവിളിച്ച് കെഎസ്ആര്ടിസി കണ്ടക്ടര്. സുല്ത്താന് ബത്തേരിയില് നിന്നും കൊടുവളളിയിലേക്ക് വരുകയായിരുന്ന ബസിലാണ് സംഭവം. പടനിലം സ്വദേശിയായ യുവാവ് ഗതാഗതമന്ത്രി ആന്റണി രാജുവിന് പരാതി നല്കി.
യുവാവും കുഞ്ഞും സ്ത്രീകളും ഉള്പ്പെടുന്ന കുടുംബം സുല്ത്താന് ബത്തേരിയില് നിന്നാണ് കെഎസ്ആര്ടിസി ബസില് കയറിയത്. ബസ് അടിവാരത്തെത്തിയപ്പോള് ശാരീരിക അസ്വസ്ഥത പ്രകടിപ്പിച്ച കുഞ്ഞ് ഒരു തവണ ഛര്ദ്ദിച്ചു. കയ്യില് സൂക്ഷിച്ചിരുന്ന പോളിത്തീന് കവറും തുണികളുമുപയോഗിച്ച് സാഹചര്യം കൈകാര്യം ചെയ്തു. ഇറങ്ങാറായപ്പോള് ഒരു കയ്യില് കുട്ടിയെയും മറ്റേ കയ്യില് സാധനങ്ങളുമായി യുവാവ് ബസിന്റെ ഡോറിന് സമീപത്ത് നില്ക്കുകയായിരുന്നു. ആ സമയം അപ്രതീക്ഷിതമായി കുട്ടി ഛര്ദ്ദിച്ചു, ബസിനുള്ളിലാവേണ്ടെന്ന് കരുതി താന് കുഞ്ഞിന്റെ തല ഫുട്ട് ബോര്ഡിലേക്ക് തിരിക്കുകയായിരുന്നെന്ന് യുവാവ് പറയുന്നു. എന്നാല് ആ സമയം ബസ് കണ്ടക്ടര് മോശമായി പെരുമാറുകയും ദേഷ്യപ്പെടുകയും ചെയ്തെന്നാണ് പരാതിയില് പറയുന്നത്.
യാത്രക്കാര്ക്ക് ബുദ്ധിമുട്ടാവുമെന്നും പറഞ്ഞ് ഒച്ചയിടാനാരംഭിച്ച കണ്ടക്ടര് അസഭ്യ വാക്കുകളും ഉപയോഗിച്ചായിരുന്നു പിന്നീടുള്ള സംസാരമെന്ന് യാത്രക്കാരും പറയുന്നു. കൊടുവള്ളിയിലിറങ്ങിയ ശേഷവും യാത്രക്കാരനും കണ്ടക്ടറും തമ്മില് സംസാരം തുടര്ന്നു. തീര്ത്തും മാനുഷിക പരിഗണനയോട് കൂടി പെരുമാറേണ്ട സാഹചര്യത്തില് ഒരു സര്ക്കാര് ജീവനക്കാരനില് നിന്നുള്ള മോശം പെരുമാറ്റം അങ്ങേയറ്റം വേദനിപ്പിക്കുന്നതായിരുന്നുവെന്ന് കുടുംബം പറഞ്ഞു.
