നോബല്‍ പുരസ്‌കാര ജേതാവ് അമര്‍ത്യ സെന്‍ അന്തരിച്ചെന്ന വാര്‍ത്ത വ്യാജം; ബാബ സുഖമായിരിക്കുന്നുവെന്ന് മകള്‍

ന്യൂഡല്‍ഹി: നൊബേല്‍ പുരസ്‌കാര ജേതാവും സാമ്പത്തിക വിദഗ്ധനുമായ അമര്‍ത്യ സെന്‍ (89) അന്തരിച്ചുവെന്ന വാര്‍ത്ത നിഷേധിച്ച് മകള്‍ നന്ദന ദേബ് സെന്‍. തന്റെ പിതാവ് ജീവിച്ചിരിപ്പുണ്ടെന്നും സുഖമായിരിക്കുന്നുവെന്നും അന്തരിച്ചെന്ന തരത്തില്‍ പ്രചരിക്കുന്ന റിപ്പോര്‍ട്ടുകള്‍ ശരിയല്ലെന്നും അവര്‍ പറഞ്ഞു.

സുഹൃത്തുക്കളേ, നിങ്ങളുടെ ഉത്കണ്ഠക്ക് നന്ദി, പക്ഷേ ഇത് വ്യാജ വാര്‍ത്തയാണ്: ബാബ പൂര്‍ണമായും സുഖമായിരിക്കുന്നു. ഞങ്ങള്‍ കേംബ്രിഡ്ജില്‍ കുടുംബത്തോടൊപ്പം മനോഹരമായ ആഴ്ച ചെലവിട്ടു കഴിഞ്ഞ രാത്രിയിലെ അദ്ദേഹത്തിന്റെ ആലിംഗനം വളരെ ദൃഢമായിരുന്നു! അദ്ദേഹം ആഴ്ചയില്‍ ഹാര്‍വാര്‍ഡില്‍ രണ്ട് കോഴ്‌സുകള്‍ പഠിപ്പിക്കുന്നു, ഒരു പുസ്തകത്തിന്റെ പണിപ്പുരയിലുമാണ് എപ്പോഴത്തെയും പോലെ തിരക്കിലാണ്!’ നന്ദന എക്‌സില്‍ കുറിച്ചു.

താനും മകളും പിതാവിനൊപ്പം നില്‍ക്കുന്ന ചിത്രവും ഇതോടൊപ്പം നന്ദന പോസ്റ്റ് ചെയ്തിട്ടുണ്ട്.

Friends, thanks for your concern but it’s fake news: Baba is totally fine. We just spent a wonderful week together w/ family in Cambridge—his hug as strong as always last night when we said bye! He is teaching 2 courses a week at Harvard, working on his gender book—busy as ever! pic.twitter.com/Fd84KVj1AT

— Nandana Sen (@nandanadevsen) October 10, 2023

അമര്‍ത്യ സെന്നിന്റെ വിദ്യാര്‍ത്ഥിയും നോബല്‍ ജേതാവുമായ ക്‌ളോഡിയ ഗോള്‍ഡിന്റെ പേരിലുള്ള അക്കൗണ്ടിലാണ് അമര്‍ത്യ സെന്‍ മരണപ്പെട്ടെന്ന് തരത്തിലുള്ള പോസ്റ്റ് പ്രത്യക്ഷപ്പെട്ടത്. ഇതോടെ ദേശീയ മാദ്ധ്യമങ്ങളിലടക്കം വാര്‍ത്ത പ്രചരിക്കുകയായിരുന്നു.