അരവിന്ദാക്ഷന്റെ അമ്മയുടെ അക്കൗണ്ട് വിവരങ്ങള്‍ നല്‍കിയത് ബാങ്ക് സെക്രട്ടറി; 63 ലക്ഷത്തിന്റെ ഇടപാടുകള്‍ നടന്നെന്ന് സമ്മതിച്ച് അരവിന്ദാക്ഷന്‍

കൊച്ചി: കരുവന്നൂര്‍ ബാങ്ക് തട്ടിപ്പില്‍ പി ആർ അരവിന്ദാക്ഷന്റെ അമ്മയുടെ അക്കൗണ്ട് വിവരങ്ങള്‍ കൈമാറിയത് ബാങ്ക് സെക്രട്ടറിയെന്ന് ഇഡി. പെരിങ്ങണ്ടൂര്‍ സര്‍വീസ് സഹകരണബാങ്ക് സെക്രട്ടറിയാണ് വിവരങ്ങള്‍ കൈമാറിയതെന്നും ഈ അക്കൗണ്ട് വഴി 63 ലക്ഷത്തിന്റെ ഇടപാട് നടന്നതായി ബാങ്കിന്റെ സ്റ്റേറ്റ്‌മെന്റെ ഉണ്ടെന്നും ഇഡി വ്യക്തമാക്കി.

63 ലക്ഷം അമ്മയുടെ ബാങ്ക് അക്കൗണ്ടില്‍ ഇട്ടെന്ന് സമ്മതിച്ച് അരവിന്ദാക്ഷന്‍

ഇതിന് പിന്നാലെ തന്റെ അമ്മയുടെ ബാങ്ക് അക്കൗണ്ടില്‍ 63 ലക്ഷം നിക്ഷേപിച്ചിട്ടുണ്ടെന്ന് സിപിഎം നേതാവ് പി.ആര്‍. അരവിന്ദാക്ഷന്‍ ഇഡിയോട് സമ്മതിച്ചു. അരവിന്ദാക്ഷനെയും സി.കെ. ജില്‍സിനെയും വീണ്ടും ചോദ്യം ചെയ്യാന്‍ കസ്റ്റഡി ആവശ്യപ്പെട്ട് നല്‍കിയ അപേക്ഷയിലാണ് ഇഡി ഇക്കാര്യം വ്യക്തമാക്കിയിരിക്കുന്നത്. ഈ അപേക്ഷ കോടതി തിങ്കളാഴ്ച പരിഗണിക്കും.

ജില്‍സിന് കൂട്ടുനിന്ന രാഷ്‌ട്രീയനേതാക്കളും ഉന്നതപൊലീസ് ഉദ്യോഗസ്ഥരും ആരൊക്കെ?

രേഖകള്‍ ഹാജരാക്കിയുള്ള ചോദ്യം ചെയ്യലിലാണ് നിക്ഷേപത്തെക്കുറിച്ച് അരവിന്ദാക്ഷന്‍ സമ്മതിച്ചത്. ബാങ്കിന്റെ മുന്‍ സീനിയര്‍ അക്കൗണ്ടന്‍റായിരുന്നു ജില്‍സ്. 4.25 കോടിയുടെ വായ്‌പ കുടുംബാംഗങ്ങളുടെയും ബിനാമികളുടെയും പേരില്‍ തരപ്പെടുത്തിക്കൊടുത്തതായി ജില്‍സ് സമ്മതിച്ചിട്ടുണ്ട്. സി.കെ. ജില്‍സ് 2011 മുതല്‍ 2019 വരെയുള്ള കാലയളവില്‍ 11 വസ്തുവകകള്‍ വില്‍പന നടത്തി. ഒരു ദിവസം ചോദ്യം ചെയ്തെങ്കിലും വസ്തുവകകളെയും നിക്ഷേപത്തെയും കുറിച്ച് വിശദാംശങ്ങള്‍ ഇവര്‍ വെളിപ്പെടുത്തിയിട്ടില്ല. അതിനാണ് വീണ്ടും ചോദ്യം ചെയ്യേണ്ടതെന്ന് ഇഡി അപേക്ഷയില്‍ പറയുന്നു. രാഷ്‌ട്രീയനേതാക്കളും ഉന്നതപൊലീസ് ഉദ്യോഗസ്ഥരും ഇതില്‍ പ്രതികളായുണ്ട്.

അരവിന്ദാക്ഷന്റെ അമ്മയുടെ നിക്ഷേപവിവരം ഇ-മെയിലിലൂടെ ബാങ്ക് സെക്രട്ടറി നല്‍കി

കഴിഞ്ഞ മാസം 22 ന് അരവിന്ദാക്ഷന്റെയും ബന്ധുക്കളുടെയും പേരിലുളള വിവരങ്ങള്‍ തേടി ഇഡി പെരിങ്ങണ്ടൂര്‍ ബാങ്കിലേക്ക് ഒരു ഇമെയില്‍ അയച്ചിരുന്നു. അന്ന് തന്നെ ബാങ്ക് സെക്രട്ടറി മറുപടി അയക്കുയും ചെയ്തു.അതില്‍ ചന്ദ്രമതിയുടെ അക്കൗണ്ട് വിവരങ്ങളും കൈമാറിയിരുന്നു. അക്കൗണ്ട് അമ്മയുടെതാണെന്ന് അരവിന്ദാക്ഷന്‍ സമ്മതിച്ചതായും അതിന്റെ അടിസ്ഥാനത്തിലാണ് അറസ്റ്റ് ചെയ്തതെന്നും ഇഡി കസ്റ്റഡി അപേക്ഷയില്‍ വ്യക്തമാക്കി.

സതീശനൊപ്പം അരവിന്ദാക്ഷന്റെ വിദേശയാത്രകള്‍ എന്തിന്?

അതിനിടെ അരവിന്ദാക്ഷന്റെ വിദേശയാത്ര, ബാങ്ക് നിക്ഷേപം എന്നിവ സംബന്ധിച്ച വിവര ശേഖരണത്തിനായി കസ്റ്റഡി ആവശ്യമാണെന്നും ഇഡി അറിയിച്ചു. ഒന്നാംപ്രതി സതീഷ് കുമാറുമായി പി ആര്‍ അരവിന്ദാക്ഷന്‍ നടത്തിയ വിദേശയാത്രകള്‍, കൂടുതല്‍ ബാങ്ക് അക്കൗണ്ടുകള്‍ വഴിയുള്ള സാമ്പത്തിക ഇടപാടുകള്‍ എന്നീ കാര്യങ്ങളില്‍ വ്യക്തത വരുത്തുകയാണ് ഇ ഡിയുടെ ലക്ഷ്യം.