തിരുവനന്തപുരം: വിദേശത്തേക്ക് കടക്കാനായി തിരുവനന്തപുരം വിമാനത്താവളത്തിലെത്തിയ പോപ്പുലര്‍ ഫ്രണ്ട് ഭീകരൻ എന്‍ഐഎയുടെ പിടിയിൽ. തിരുവനന്തപുരം നെടുമങ്ങാട് തൊളിക്കോട് സ്വദേശി സുള്‍ഫി ഇബ്രാഹിമാണ് പിടിയിലായത്. ഇയാളെ ചോദ്യംചെയ്യാനായി എന്‍ഐഎ ഉദ്യോഗസ്ഥര്‍ കൊച്ചിയിലേക്ക് കൊണ്ടുപോയി.
പോപ്പുലര്‍ ഫ്രണ്ടിന്റെ നിരോധനത്തിന് പിന്നാലെ ഇയാള്‍ ഒളിവില്‍പോയിരുന്നു. തുടര്‍ന്ന് ഇയാള്‍ക്കായി എന്‍ഐഎ ലുക്കൗട്ട് നോട്ടീസ് പു റപ്പെടിവിച്ചിരുന്നു. കുവൈത്തിലേക്ക് പോകാനാണ് ഞായറാഴ്ച രാവിലെ സുൾഫി വിമാനത്താവളത്തിൽ എത്തിയത്. ഇവിടെ വച്ച് എമിഗ്രേഷൻ ഉദ്യോഗസ്ഥർ ഇയാളെ തടയുകയായിരുന്നു. തുടര്‍ന്ന് വലിയതുറ പോലീസിന് കൈമാറി. വലിയതുറ പോലീസ് എന്‍ഐഎയെ വിവരമറിയിക്കുകയായിരുന്നു.
പോലീസില്‍നിന്ന് ലഭിച്ച വിവരമനുസരിച്ച് എന്‍ഐഎ ഉദ്യോഗസ്ഥര്‍ വലിയതുറ സ്‌റ്റേഷനിലെത്തി. തുടര്‍ന്ന് സുള്‍ഫി ഇബ്രാഹിമിന് ചോദ്യംചെയ്യലിന് ഹാജരാകാനുള്ള നോട്ടീസ് നല്‍കി. ഇതിനുപിന്നാലെയാണ് സുള്‍ഫി ഇബ്രാഹിമിനെ കൊച്ചിയിലേക്ക് കൊണ്ടുപോയത്. പോപ്പുലർ ഫ്രണ്ടിനെ നിരോധിക്കുന്ന സമയത്ത് സുൾഫിയുടെ നെടുമങ്ങാട്ടെ വീട്ടിൽ എൻഐഎ റെയ്ഡ് നടത്തിയിരുന്നു. ഇവിടെ നിന്നും നിരവധി രേഖകൾ പിടിച്ചെടുത്തിരുന്നു.
