ശ്രീനഗര്: ജമ്മുകാഷ്മീരിലെ അനന്ത്നാഗിൽ സൈന്യം രണ്ടു ഭീകരരെ വധിച്ചു. ഭീകരരുമായി ഏഴു ദിവസമായി നടന്നു വരുന്ന ഏറ്റുമുട്ടല് ഇതോടെ അവസാനിച്ചതായും തിരച്ചില് തുടരമെന്നും ജമ്മുകാഷ്മീര് എഡിജിപി വിജയ് കുമാര് അറിയിച്ചു.കൊല്ലപ്പെട്ട ഭീകരരില് ആക്രമണത്തിന്റെ മുഖ്യ സൂത്രധാരനും ലഷ്കര് ഇ ത്വയ്ബ കമാന്ഡറുമായ ഉസൈര്ഖാനും ഉള്പ്പെട്ടിട്ടുണ്ട്. ഇയാളിൽ നിന്നും ആയുധങ്ങളും കണ്ടെടുത്തിട്ടുണ്ട്.
കഴിഞ്ഞ ദിവസം കത്തിക്കരിഞ്ഞ നിലയില് ഒരു ഭീകരന്റെ മൃതദേഹം കണ്ടെത്തിയിരുന്നു. എന്നാല് ആളെ തിരിച്ചറിഞ്ഞിട്ടില്ല. കൊക്കർനാഗിലെ ഗാദുലിലെ വനത്തിലും മലയോര മേഖലയിലും സെപ്റ്റംബര് 13 മുതല് ഭീകരരുമായി സംയുക്തസേന നടത്തിവന്ന ഏറ്റുമുട്ടലില് മൂന്നു സൈനികര്ക്കും ഒരു പോലീസ് ഉദ്യോഗസ്ഥനും ജീവന് നഷ്ടമായിരുന്നു.
19 രാഷ്ട്രീയ റൈഫിള്സിലെ കമാന്ഡിംഗ് ഓഫീസര് കേണല് മന്പ്രീത് സിംഗ്, മേജര് ആശിഷ് ധോന്ചക്ക്, ശിപായി പ്രദീപ് സിംഗ്, ജമ്മുകാഷ്മീര് പോലീസിലെ ഡിഎസ്പി ഹുമയൂണ് ഭട്ട്, എന്നിവരാണ് വീരമൃത്യു വരിച്ചത്. ഭീകര സംഘടനയായ ലഷ്കർ-ഇ-തൊയ്ബയുടെ ശാഖയായ ടിആർഎഫ് ഭീകരാക്രമണത്തിന്റെ ഉത്തരവാദിത്തം ഏറ്റെടുത്തിരുന്നു. 10 ലക്ഷം രൂപ പാരിതോഷികം പ്രഖ്യാപിച്ചിരുന്ന ഉസൈർ ഖാൻ എന്ന ഭീകരനാണ് ആക്രമണം നടത്തിയത്.
