തൃശൂർ: ട്രെയിൻ മുഖേന തൃശൂരിലെത്തി ഹെറോയിൻ കൈമാറാൻ ശ്രമിച്ച അസം സ്വദേശിനി അറസ്റ്റിൽ. അസമിലെ ഗവ്ഗാവ് സ്വദേശിനി അസ്മരാ കാത്തൂൺ ആണ് പിടിയിലായത്. അടിവസ്ത്രത്തിൽ ഒളിപ്പിച്ച നിലയിലായിരുന്നു ഹെറോയിൻ കണ്ടെത്തിയത്. 9.66 ഗ്രാം ഹെറോയിനാണ് എക്സൈസ് പിടികൂടിയത്.
എക്സൈസ് കമ്മീഷണറുടെ മദ്ധ്യമേഖല സ്ക്വാഡ് എക്സൈസ് സർക്കിൾ ഇൻസ്പെക്ടർ പി ജുനൈദിന് ലഭിച്ച രഹസ്യ വിവരത്തിന്റെ അടിസ്ഥാനത്തിലാണ് പരിശോധന നടന്നത്. മയക്കുമരുന്ന് തൃശൂരിൽ കൈമാറുന്നതിന് വേണ്ടി റെയിൽവേ പ്ലാറ്റ്ഫോമിൽ കാത്തു നിൽക്കവെയാണ് പ്രതി പിടിയിലായത്. വസ്ത്രത്തിനുള്ളിൽ പ്രത്യേക അറയുണ്ടാക്കി അതിനുള്ളിലാണ് ഹെറോയിൻ ഒളിപ്പിച്ചത്.
