കോട്ടയം: പുതുപ്പള്ളി തെരഞ്ഞെടുപ്പിൽ വോട്ടെടുപ്പ് കഴിഞ്ഞതോടെ പരാജയഭീതിയിൽ സിപിഎം. ചാണ്ടി ഉമ്മൻ വിജയിച്ചാൽ അത് ബിജെപി വോട്ട് മറിച്ചിട്ടായിരിക്കുമെന്ന് സിപിഎം സംസ്ഥാന സെക്രട്ടറി എം.വി ഗോവിന്ദൻ. ബിജെപി വോട്ടുകൾ യുഡിഎഫിന് ലഭിച്ചതായാണ് കണക്ക് കൂട്ടൽ. അല്ലാത്തപക്ഷം എൽഡിഎഫിന് വിജയിക്കാൻ കഴിയുമെന്നും ഗോവിന്ദൻ മാധ്യമങ്ങളോട് പറഞ്ഞു.
എം. വി ഗോവിന്ദന്റെ പ്രസ്താവന വന്നതിന് പിന്നാലെ ആശങ്കയിലാണ് പാർട്ടി അണികൾ. പുതുപ്പള്ളിയില് ജെയ്ക്കിന്റെ പരാജയം തുറന്ന് സമ്മതിക്കുകയാണോ പാര്ട്ടി സെക്രട്ടറി എന്ന ആശയക്കുഴപ്പത്തിലാണവർ. “താഴെത്തട്ടിലെ കണക്കെല്ലാം കിട്ടിയിട്ടുണ്ട്. പ്രശ്നം ഇത്രയേയുള്ളൂ, ബിജെപിക്ക് പത്ത്- പത്തൊന്പതിനായിരം വോട്ടുണ്ട് അവിടെ. ആ ബിജെപി വോട്ട് യുഡിഎഫ് വാങ്ങിയോ എന്ന് നല്ല സംശയമുണ്ട്. വോട്ടെണ്ണുമ്പോള് മാത്രമേ അത് മനസിലാകുകയുള്ളൂ. ബിജെപി വോട്ട് വാങ്ങാതെ ചാണ്ടി ഉമ്മന് ജയിക്കില്ല. വാങ്ങിയിട്ടില്ലെങ്കില് ഞങ്ങള് ജയിക്കും”, സിപിഎം സംസ്ഥാന സെക്രട്ടറി അവകാശപ്പെട്ടു.
ആരു ജയിക്കും, തോല്ക്കും എന്നത് വസ്തുനിഷ്ടമായിരിക്കുകയാണ്. ആരു ജയിച്ചാലും വലിയ ഭൂരിപക്ഷമൊന്നും ഉണ്ടാവില്ല. വളരെ ചെറിയ ഭൂരിപക്ഷമേ ഉണ്ടാകുകയുള്ളൂ. ഇനി വെറുതേ അവകാശവാദങ്ങള് ഉന്നയിക്കേണ്ട കാര്യമില്ല. വലിയ അവകാശവാദമൊന്നും ഉന്നയിക്കുന്നില്ലെന്ന് ആദ്യമേ പറഞ്ഞതാണ്. വലിയ രീതിയിലുള്ള സംഘടന- രാഷ്ട്രീയപ്രവര്ത്തനത്തിന്റെ ഭാഗമായി ജയിക്കാന് സാധ്യതയുണ്ടെന്ന് തന്നെയാണ് നേരത്തേയും പറഞ്ഞത്. പോളിങ് കഴിഞ്ഞപ്പോഴും അതുതന്നെയാണ് പറയാനുള്ളത്”, ഗോവിന്ദന് പറഞ്ഞു.
